Nëse jeni të përditësuar me showbizin vendas, duhet ta keni marrë vesh tashmë që Luana ju dhuroi një këngë për ditëlindje. Titullohet “Ti Amo” dhe shoqërohet me një videoklip – që siç e ka bërë të qartë disa herë – është realizuar me një dubël të vetme. Nga fillimi në fund, videoja nuk pritet asnjëherë. Mund të themi se s’ka pasur nevojë për montazhier këtë herë.

Sidoqoftë, kjo s’është hera e parë që këngëtarët shqiptarë i largohen videoklipeve standarde me vajza me bikini buzë detit për të sjellë diçka në mos të veçantë, ndryshe.

Së pari kemi Shpat Dedën dhe këngën e tij ikonike, “Ëndërroj.” Videoklipi i “Ëndërroj” konsiston në një vajzë që ha kokoshka e ecën në dukje pambarimisht, në shi e nën shkallë, për të arritur te Shpati, që po i këndon me kitarë pranë ekranit. Klipi nuk pritet në asnjë moment, porsi vajza që s’e takoi kurrë Shpatin.

Së dyti, një tjetër këngë ikonike, “Bonbon” nga Era Istrefi. E xhiruar diku në një vend me dëborë në Kosovë, Era performon para kamerës me xhupin me pellush rozë që fitoi popullaritet të menjëhershëm pas publikimit të videos. Videoklipi është one shot për dy minuta e dhjetë sekonda e më pas regjisori hoqi dorë dhe përfshiu momente të ndryshme të Erës që kërcen.

Së treti (dhe ndoshta së fundi?) Ledri Vula me “Kings” që është më i ndërlikuari në listë. Në një ngrehinë të braktisur, Gaforrja juaj e preferuar hyn dhe del nga dhoma ku shfaqen imazhe në lidhje me tekstin, si për shembull arkivoli i hip-hop apo një gramafon kur përmendet fjala CD.

Nëse kemi harruar ndonjë, na shkruani. Ju e dini ku.