Që në sezonin e kaluar televiziv, kur nisi programi i rimodeluar i pasdites në Top Channel, “Ftesë në Pesë”, nisi edhe një “luftë” e heshtur midis dy moderatoreve Rudina Magjistari dhe Bieta Sulo. Ato që filluan si thumbime të tipit “kush e veshi e para një fustan” (a thua se ka rëndësi), rrodhën më pas duke vendosur në qendër audiencën dhe risitë. Aq të shpeshta janë bërë krahasimet e dy emisioneve, sa janë kthyer në qesharake për disa arsye.
Së pari, programet e pasditeve nuk janë të shpikura as nga Top Channel dhe as nga Tv Klan. Emisionet me të ftuar të njohur dhe të panjohur, intervista, video-mesazhe dhe jo vetëm janë formula të përhapura kudo nëpër televizionet botërore.
Së dyti, YouTube nuk është matës i audiencës. Në një intervistë për Revista Class, Bieta Sulo e vlerësoi veten me 10 me yll, pasi “Ftesë në 5” arriti 10 milionë klikime në YouTube. “Ndaj edhe u tregova kaq dorëlëshuar me notën për veten, duke marrë për bazë edhe këtë rekord,” u shpreh ajo. “’Ftesë në 5' e nisi rrugëtimin vetëm shtatorin e kaluar dhe brenda një sezoni televiziv arriti të bëhet programi më i ndjekur i pasdites. Në një realitet mediatik, ku audiencë-matësit janë të pabesueshëm nga të gjitha palët (emisionet investigative e kanë dëshmuar herë pas here mungesën teknike-logjistike të tyre për ta kryer funksionin), platforma Youtube bëhet arbitri më ekzakt në këtë drejtim.”
Siç e thamë më sipër, suksesi i programit nuk mund të argumentohet përmes klikimeve në YouTube, pasi rrjedhimisht përjashtohet audienca që ka ndjekur emisionin nga televizori. Aq më tepër që YouTube funksionon edhe me share (shpërndarje) dhe klikimet varen nga personazhet e ftuar. Për shembull, nëse disa të ftuar me një numër të konsiderueshëm ndjekësish në Instagram bëjnë share intervistën, rrjedhimisht rriten klikimet te videot specifike, të cilat nuk shërbejnë si matës të audiencës konsistente të të gjithë sezonit televiziv. Te ky i fundit, në fakt lufta e vërtetë bëhet me sponsorat.
Së treti, a mos është herët për krahasime? “Ftesë në 5” e nisi rrugëtimin në shtator të 2018-s, çka do të thotë se një sezon televiziv është i pamjaftueshëm për t’u krahasuar me konkurrentin, i cili ka një eksperiencë prej afro një dekade. Ju kujtojmë që emisioni i pasdites në Top, që nisi me Arbana Osmanin në 2009-n me emrin “Pasdite në Top Channel” ndërroi disa herë moderatore – ku pjesë e programit u bënë Genta Popa, Lira Burgija, Ulpiana Lama, Kozeta Turishta, Jonida Shehu, Juli Krisafi – duke treguar paqëndrueshmëri krahasuar me Rudina Magjistarin, e cila është shkëputur vetëm për pak kohë për shkak të shtatzënisë.
Së fundmi, siç mund ta keni lexuar, si një kundërpërgjigje ndaj deklaratës së Magjistarit, Bieta Sulo publikoi një sondazh të @revistakozmetike – faqe në Instagram që ka diku te vetëm 8600 ndjekës – duke falenderuar ndjekësit që “pëlqyen më shumë look-un e saj.” Në fakt, postime të tilla nuk janë aspak të hijshme dhe me frymë feministe për dy programe, të cilat ndiqen më së shumti nga gratë.
E vetmja mënyrë që emisionet “Rudina” dhe “Ftesë në 5” të konkurrojnë njëri-tjetrin është përmes temave të diskutuara dhe të ftuarve interesantë; krahasimet e mësipërme nuk i shërbejnë në asnjë moment publikut. Është ende herët për përfundime ndaj le t’ja lëmë kohës.
