Që Dua Lipa do performonte dhe vetë këtë vit në Sunny Hill Festival, e dinim. Që do këndonte një këngë shqip për të ndjekur zakonin e të kënduarit një këngë të njohur nga vendi ku ka performuar gjatë turneut të saj "Radical Optimism", gjithashtu e dinim. Por që do ngjitej në skenë me babain e saj, Dukagjin Lipa, dhe të këndonin "Era" nga grupi Gjurmët, kjo ishte një surprizë shumë e këndshme.
Gjurmët është një grup i njohur rock-u nga Kosova, i formuar në Prishtinë në vitin 1981 dhe aktiv deri më 1988, me vokalist Migjen Kelmendin, tani gazetar i njohur. Ata publikuan albumet “Gjurmët” (1984), “Gjurmët 1982-1988” (1988) dhe një përmbledhje në vitin 2002 me incizime të përmirësuara dhe reflektime retrospektive. Në fund të vitit 2015, grupi u rikthye me një koncert gala në Pallatin e Kongreseve në Tiranë.
Këngën "Era" megjithatë, njerëzit mund ta njohur më shumë prej ripërpunimit të famshëm të McKreshës në vitin 2015.
Dukagjin Lipa nga ana tjetër, ka qenë gjithashtu solist i një grupi rock-u në Kosovë, "ODA", aktiv gjatë viteve '90-të, ndaj ky rikthim në skenë me siguri ka qenë një ndjesi e bukur dhe për babain e Duas, i cili meqë ra fjala, ndoshta duhet të konsiderojë një rikthim të mirëfilltë në muzikë. ;)
Ndërkohë, ja një përmbledhje e disa prej këngëve që Dua Lipa ka kënduar në shtetet përkatëse ku ka bërë koncerte gjatë turneut, duke respektuar kulturën e vendit:
Itali: “A far l’amore comincia tu” nga Raffaella Carrà.
Spanjë: “Héroe” nga Enrique Iglesias dhe “Me gustas tú” nga Manu Chao.
Francë: “Moi... Lolita” nga Alizée dhe “Dernière danse” nga Indila.
Gjermani: “99 Luftballons” nga Nena dhe “Wind of Change” nga Scorpions.
Australi: “Highway to Hell” nga AC/DC, “Torn” nga Natalie Imbruglia, “Can't Get You Out of My Head” nga Kylie Minogue.
