Dje, familja dhe miqtë i dhanë lamtumirën e fundit Sabrina Lekajt, 22-vjeçares shqiptare që u vra nga babai në makinën e saj më 22 korrik. Babai i saj mungoi në funeral, sepse është ende nën vëzhgimin e policisë. Nëna dhe vëllai i saj, Romina dhe Pyrrhus, mbajtën të dy fjalime përpara arkivolit rozë të të resë.

Gjatë funeralit nuk u përmend në asnjë moment ndodhia tragjike. Familja donte të kujtonte momentet e bukura që kaluan bashkë.

“Gjëja e fundit që më tha ishte ‘të dua dhe shihemi pastaj,” tha vëllai i vogël i Sabrinës. “Ajo ishte shumë e zgjuar dhe gjithmonë më nxiste të bëhesha më i mirë, më ndihmonte me shkollën dhe më shtynte drejt suksesit. Atë do të kishte dashur prej meje. Motra ime ishte e dashur dhe e dhembshur. Kudo që shkonim, shkonim bashkë. Shkonim nëpër dyqane, në park. Rrinim në dhomat e njëri-tjetrit dhe shihnim televizor bashkë. I tregonim njëri-tjetrit çdo problem që kishim.”

Nëna e saj, Romina rikujtoi momentet e vyera me të bijën dhe nuk iu referua në asnjë moment detajeve të ngjarjes së tmerrshme.

“Bija ime, ti s’na ke lënë – do të jesh gjithmonë mes nesh. Ishe kaq e bukur, kaq e zgjuar dhe ke ndikuar kaq shumë njerëz,” tha zonja Lekaj mes lotësh. “Jemi të rrënuar nga humbja jote, Sabrina, por dua të fokusohem te ditët e mira. Dua të kujtoj ditën që të solla në shtëpi nga materniteti. Dua të kujtoj ditën e parë të kopshtit kur u ktheve nga unë dhe më the ‘mos eja të më marrësh deri në orën tre, mirë?’ Dua të kujtoj herën e parë që të çova në kursin e pianos dhe në fund i kërkove mësuesit: ‘A mund të vij dhe nesër dhe pasnesër?’ Dua të kujtoj ditën e diplomimit tënd, sa orë harxhuam duke rregulluar flokët e tu.”

Sabrina Lekaj u përcoll për në banesën e fundit në një arkivol rozë, mbi të cilin ishin printuar një foto portret e të resë, një foto e saja teksa luan në piano, diploma dhe një citim nga “Mary Poppins Returns.”

Sabrina Lekaj u vra nga babai i saj, pasi ajo kishte dalë me shoqet dhe kishte fjetur te shtëpia e njërës prej tyre. Babai, Petrit Lekaj, gjithashtu i shkaktoi vetes plagë në trup dhe gjendet në spital, në Adelaide. Ai u paraqit në gjykatë përmes një video-telefonate dhe do të mbetet nën mbikqyrjen e policisë. Seanca e radhës është në janar dhe atëherë, avokati i tij mund të kërkojë liri me kusht.