Le të tregohemi të sinqertë. U nisëm nga komentet e dyshimta në videon e “Yalla Habibi” të Luana Vjollcës me Faydee. Një sërë njerëzish me profile të huaja komentonin të njëjtën gjë. Kjo ngriti dyshime në mos komentet, të gjitha pozitive, janë të blera. Më shumë për këtë mund të lexoni këtu.
Si qëndron e vërteta pas blerjes së komenteve në YouTube
Blerja e komenteve në YouTube është një teknikë kontroversiale që shihet shtrembër, por ndonjëherë, funksionon. Sidomos në rastet kur një video ka shikime dhe pëlqime të blera, nevojiten dhe komente të blera që shifrat të mos duken të dyshimta.
Por nuk është aq e thjeshtë sa duket. Nëse blihen komente nga njerëz të vërtetë, videoja bëhet më e suksesshme. Por, nëse blihen komente nga robotë, njerëzit e dallojnë dhe largohen të zhgënjyer.
Pse njerëzit blejnë komente në YouTube
1. Për të rritur angazhimin e shikuesve
Kur blihen komente, shikuesit e rinj të videos në fjalë, mendojnë se po komentohet shumë. Kjo i bën të ndihen më rehat dhe pse jo, të komentojnë edhe vetë. Të tjerë do të komentojnë për të rënë dakord ose për të kundërshtuar komentuesit e tjerë. Dhe meqë videon po e komentojnë gjithnjë e më shumë njerëz, do t’u shfaqet më shumë përdoruesve që fare mirë mund ta klikojnë e ta shohin.
2. Për të mbytur komentet negative
YouTube është një vend i ashpër. Disa njerëz kritikojnë dhe s’ke ç’bën për këtë fakt. Kur blihen komente, natyrshëm pozitive, ata negativë përmbyten dhe nuk bien më në sy.
3. Për t’i bërë shikimet e blera të duken organike
Një video që ka shikime të blera dallohet menjëherë nga raporti shikime/komente. E zëmë, nëse një video ka 1 milionë shikime brenda një dite dhe 25 komente, kjo duket e dyshimtë dhe jonatyrale. Kush blen shikime dhe pëlqime, gjithmonë blen edhe komente për ta bërë gjithçka të duket organike.
Rasti në fjalë
Ne analizuam raportin shikime/komente të disa këngëve shqiptare në YouTube dhe sipas disa përllogaritjeve tejet të thjeshta, mesatarisht raporti duhet t’i përafrohet vlerës 2800. Raporti shikime/komente i “Yalla Habibi” është 9561.
Fakti që videoja është publikuar në kanalin e Luanës, i rrit dyshimet, sepse vihet re mungesa e komentuesve shqiptarë, të cilët me të drejtë duhet të mbizotërojnë. Së dyti, në Instagram bien në sy kritikat e shumta që ka marrë kënga, në cilindo prej profileve të këngëtarëve. Ndërsa në seksionin e komenteve në YouTube nuk dallohet asnjë koment negativ. Gjë që përkon me pikën e dytë, listuar më sipër.
Prej kohësh ka qenë e dyshimtë shpejtësia me të cilën arrijnë një milionë apo edhe më shumë klikime disa projekte shqiptare. Askush s’do ta pranojë në sy të botës se blen shikime apo komente, por sidoqoftë, fshati që duket s’do kallauz.
