Në një intervistë për Panorama Plus, ish-Miss Albania, Egla Harxhi, tregoi ndër të tjera për mënyrën si ajo dhe partneri i saj Alexandre de Basseville lanë Parisin për t’u shpërngulur në Libofshë (Fier), një territor të cilin kanë në plan ta shndërrojnë si Ibiza.
“Kur u largova nuk kisha më në mendje të kthehesha, në mënyrë absolute jo, por sot i jap më shumë kuptim thënies: Kurrë mos thuaj kurrë! Jam kthyer sepse për herë të parë kam diçka, tek e cila besoj me çdo qelizë. Besoj te kauza e ndryshimit të Shqipërisë në një sistem të ri politik, ekonomik dhe shoqëror, besoj te fakti se ky vend do të bëhet dhe se sot refuzoj nga kushdo shprehjen që është kthyer në një mantra: 'Eh, harroje, ky vend nuk bëhet!' Se çfarë do të thotë 'bëhet', asnjëri nuk e di, por një gjë është e sigurt, që çdo gjë bëhet ashtu siç ti e mendon dhe e projekton.” – tregoi ajo për arsyen e kthimit në Shqipëri, pas largimit në Paris.
Përsa i përket Principatës së Libofshës, midis të qenurit një objekt real apo thjesht utopi, Egla sqaron se “objektivi është që në zonën e Libofshës të krijohet një rezervë natyrore, e cila në bazë ka mbrojtjen e ekosistemit”. “Kemi punuar gjatë për të përpiluar një projekt zhvillimi ekologjik, i cili në koncept ka një stil jetese në autonomi totale dhe të pavarur nga shoqëria e konsumit dhe falsitetit. Duhet të kthehemi tek esencialja, te bazat e natyrës. Do të ketë ndërtime të cilat kanë impakt zero në ambient, elektricitet me energji diellore, riciklim i ujit. Fermerët e zonës janë të gatshëm të bashkëpunojnë për zhvillimin e agrikulturës dhe projektit në tërësi. Kemi disa marrëveshje me partnerët e biznesit për t’i dhënë formë projektit.”
Ndër të tjera, ajo shton se ka edhe financues, kryesisht miq milarderë të partnerit. “Shumë miq tanë miliarderë, të cilët sot, mbas një pasurimi kolosal, po i bëjnë pyetjen vetes se ku po shkojmë si shoqëri, ata vetë i janë kthyer një stili jetese ku nuk besojnë më te konsumi eksesiv që po shkatërron planetin. Ata janë gati të ndjekin Alexander symbyllazi në këtë projekt sepse vërtet besojnë te vizioni që ai ka. Kur ka shkuar për herë të parë në Ibiza për të investuar, ishte një ishull që nuk kishte asgjë sepse në atë kohë vendi ku të gjithë shkonin ishte Saint Tropez. Askush nuk kishte besim tek Ibiza. Por shikoni Ibiza sot.” Shumë prej tyre kanë propozuar të sjellin në Libofshë madje dhe luanë ose specie, të cilat janë në zhdukje sot, dhe plani është që të krijohet një rezervë natyrore me varietete speciesh të florës dhe faunës për t’i mbrojtur. Ne do të vendosemi brenda këtij viti atje në një vend që nuk do e bëjmë publik, për momentin. Kjo kohë deri tani ka qenë periudhë përgatitore, studimi, analizimi dhe strukturimi. Tani jemi gati për aksion!” – përfundon Harxhi.
