Ndoshta në botë, prodhimi dhe publikimi i serialeve online jo vetëm që është një koncept i mirëzhvilluar, por ka arritur në kulmin e tij. Shikuesi paguan një shifër të caktuar çdo muaj, qoftë për Netflix, Hulu a Amazon Prime dhe mund të shohë me qindra, në mos mijëra, seriale të ideuar dhe realizuar pikërisht për këtë qëllim, pra të shihen online.

Në Shqipëri e Kosovë, prodhimet janë ende të fokusuara në televizion. Në artikullin e cunguar të Wikipedia-s që liston një sërë serialesh shqiptare, të gjithë janë transmetuar në televizion, kryesisht në RTK dhe RTSH, rast përjashtimor Top Channel dhe Klan Kosova.

Së fundi, vihet re një ndryshim në prodhimin e serialeve shqip. “Te Berberi” dhe “Shpk Nazi” janë dy seriale kosovare që publikohen vetëm online. I pari është xhiruar në Zvicër dhe flet për një emigrant shqiptar, që ka hapur një berberhane në Basel, por nuk di të qethë. Ndërsa i dyti, rrotullohet rreth një marketi, Shpk Nazi, që promovon produkte shqiptare. Të dy serialet janë ide të Ard Islamit.

Ndërsa në Shqipëri, ekziston vetëm një serial që publikohet online. Po, e gjetët. #Love #Likes #Tirana, prodhim i Anabel Entertainment, me skenar të Dalina Buzit. Nëse s’jeni të përditësuar, #LLT trajton të përditshmen e Tiranës, trajton Tiranën e ndarjeve, dashurive, problemeve në familje, në karrierë, Tiranën moderne.

Sigurisht, duhen përmendur edhe prodhimet që publikohen në Gjirafa Video si “Kafeneja Jonë” apo “Kombinati.”

Publikimi online ofron një lloj lirie te autori sepse s’ka pse të limitohet nga rregullat që mund të vendosë televizioni apo rrjeti transmetues. Gjithashtu, qëndron më pranë publikut, sepse s’ka ndërmjetës dhe është gjithnjë lehtësisht i arritshëm në YouTube a në një platformë të ngjashme.

Thonë që s’ka asgjë të re nën dritën e diellit dhe vërtet, çfarëdolloj tematike të ketë një serial shqiptar, është eksploruar me dhjetëra herë jashtë. Ama, ka diej të rinj dhe këto tematika fare mirë mund të sillen për audiencën shqiptare, frymëzuar nga kultura jonë, ashtu siç po ndodh.

Sa më shumë seriale a filma shqiptarë të prodhohen, aq më mirë, përtej vendit ku publikohen. Konkurrenca thjesht nxit zhvillimin dhe kështu, në luftë për vëmendjen e publikut, prodhimet do të përmirësohen e përmirësohen deri sa një industri e lënë pas dore – ajo e filmit dhe serialit – të rilulëzojë.