“Kam punuar kamarier dikur dhe më vjen një vajzë dhe unë shkova dhe bëra detyrën time. U tregova mëse i sjellshëm. E pyes për porosinë dhe më flet tërë po*dhë: ‘Më sill një spremuto’. U largova, e lashë në pritje dhe i shkoj pas 10 minutash dhe i them: ‘Më fal, por s’e kuptova çfarë porosite, çfarë do të thotë?’. E bëra për kunjë. Më kthehet ‘po si ka mundësi që punon kamarier?’. I kërkova falje dhe i thashë mund të ma thoni se çfarë është? ‘Unë s’e di,” më tha. ‘Thjesht e kam dëgjuar dhe më duket fjalë e bukur’.“

“Gjëja më e çuditshme që më ka ndodhur në punë: Unë punoj së bashku me të fejuarin tim, ai shef kuzhine, ndërsa unë shefe kamariere në një hotel me 3 yje në Itali dhe sot mungonte njëra nga vajzat e m’u desh të shkoja unë të shërbeja mëngjesin në dhomë te një çift gjerman. Trokas, hyra dhe ç’të shoh... Burri po depilonte gruan dhe unë ngela. Ata qeshën. Më thanë të mos vihesha në siklet, pasi kishin 30 vite martesë dhe të ndihmonte gruan me depilimin e këmbëve është kënaqësi për të (burrin).”

“Hera e parë që tregoj një histori këtu, por m’u kujtua diçka e pazakontë që më ka ndodhur në punë. Unë punoj në shtet dhe godina e institucionit nuk është dhe aq e mirëmbajtur, ka nevojë për rikonstruksion. Tualetet gjithashtu, me dyer të prishura. Flas për tualetet pasi aty më ndodhi ajo gjë.

Hyj brenda dhe mbyll derën e parë me çelës nga brenda. Dera e brendshme ishte pa dorëzë, por atë gjënë që ngec nga brenda te çelësi e kishte. Dhe unë si e mençur, pa e vënë re, shtyj derën dhe ajo mbyllet. Ngela brenda. Kam tentuar të tërheq derën që ta shqyeja sepse ishte derë alumini me xham, por ishte e pamundur të lëvizte. Të bërtisja nuk mundesha sepse më vinte trup, sapo kisha filluar punë. Por edhe sikur të bërtisja, ç’do bënin ata jashtë sepse unë i kisha mbyllur dyert e tualetit me çelës.

Shyqyr më shkuan sytë sipër bordurës së derës dhe ishte një hapësirë katrore sa një televizor. Për dreq atë ditë kisha veshur fund lëkure me geta dhe taka. Kam hequr takat, i hodha nga ana tjetër dhe jam ngjitur si Spiderman dhe jam hedhur në anën tjetër. Getat i grisa dhe u gërrica nga këmbët, por në dreq përpara turpit që do të kaloja po ta merrnin vesh. Vesha takat dhe dola si zonjë për në zyrë.”

“Historia ime e pazakontë në punë është kjo: Në vitin 2005 isha 24 vjeç dhe punoja në një ishull të Greqisë si kamarier në restorant. Kisha pesë sezone që bëja atë punë. Pas një fatkeqësie që më ndodhi dhe humba njeriun që kam dashur më shumë në këtë botë, dashurinë time, gocën që doja me gjithë shpirt, m’u neverit ai ishull dhe e gjithë Greqia. Vendosa të ikja në Zvicër se kisha krijuar shoqëri me një familje zviceriane që ishin klientë për katër vite te restoranti që punoja në ishull.

Ika në Zyrih dhe jetoja me familjen që ju tregova dhe pas pak ditësh fillova të kërkoja punë. Anglishten e kisha mësuar shumë mirë, ndërsa gjermanishten pak fare. Përfundimisht fillova punë në një restorant të motrës së zonjës që banoja. 2 javët e para, çdo gjë ishte mirë, por më pas ndryshuan gjërat dhe zonja e hotelit që ishte atëherë 52 vjeçe më tha që ose duhet të bëja seks me të, ose nuk mund të vazhdojë më punën. Akoma nuk dija mirë gjermanisht, i detyruar pak, por edhe qejfi ma kishte, pranova. Por më e keqja nuk mbaroi aty. Ajo deshte që të shkoja dhe me shoqet e saj. Sot jam i martuar me vajzën e shoqes së saj dhe që nga viti 2006 jemi thjesht shoqëri e mirë.”

“Momenti më i sikletshëm ka qenë kur kapa sekretaren duke u puthur me drejtorin. Nuk e doja veten. Ata më panë, unë i pashë. U skuqa dhe u zhduka nga sytë këmbët. Si përfundim, thjesht m’u rrit rroga pak ditë më vonë. Nuk bëra zë.”

“Kjo tema më kujtoi një ndër momentet më të sikletshme që më ka ndodhur në punë. Më duhet të dorëzoja disa raporte, të cilat duhet t’i prezantoja te zyra e shefit. Më thotë që pas një ore do të ishte i lirë dhe mund të shkoja në zyrë. Dakord, pasi përfundova shkresat, po prisja të më thërriste. E si përfundim shkova dhe po i shpjegoja shifrat. Gjatë bisedës, ndjeva një si rrjedhje te këmbët. Mendova se ishte thjesht imagjinata ime. Vazhdoja të flisja për shifra e budalliqe, por mendjen nuk e kisha fare sepse po më shqetësonte ajo që po ndjeja mes këmbëve. Përfitova nga rasti kur shefi doli jashtë sepse e morën në tel për të parë çfarë po ndodhte. Më kishin ardhur ato. Më e keqja ishte se isha me fund rozë dheeeeee isha ulur në një karrige si ngjyrë bezhë. Më ra pika. Si të ngriheshaaaaaa. Sikur më pa Zoti! Hyn shefi dhe më thotë ‘flasim për 1 orë, sepse po shkoj diku’. Dal me vrap dhe menjëherë thërras sanitaren. I mora gjithë solucionet e mundshme dhe nisa të pastroja karrigen. Ngeli pak shenjë, por për fat mbulesa ishte e lëvizshme dhe e pastrova mirë e mirë në shtëpi. Atë ditë s’do ta harroj kurrë.”

“Cfarë më kujtove. Isha tek puna dhe më vjen dikush e më kërkon një palë pinca. I kishte hedhur makinës naftë në vend të benzinës (makinë e vjetër). I hoqi tubin e pompaçisë dhe i bindte motorinos që të nxirrte naftën dhe benzinën e bërë bashkë. Për një moment mbush dorën dhe më thotë ca të duket, naftë apo benzinë? I them hajd e provojmë. Ky tipi e derdh ngjitur me makinën, i vë flakën unë dhe mori direkt. Më thotë qenka më shumë benzinë.  Thashë ta fik një herë, po sa kisha blerë atlete të reja dhe thash po e lë të fiket vet. Kur sa kthej kokën unë merr makina nga poshtë se ishte mbushur vendi gjithë benzinë. Ky tipi që ulërinte, i binte kokës me grushta dhe thoshte ç'na u desh që e provuam dhe unë që nuk mbaja dot të qeshurën. Iu dogj të ziut gjithë ça kishte makina pjesë të djegshme tek motori, me kabuj, me rripa, me cdo gjë.”

- Letra të mbërritura në Revista Anabel në Facebook në lidhje me temën: "Ndodhitë më të pazakonta në punë".