Metro Boomin, producenti amerikan, është paditur për sulm seksual ndaj një gruaje. Një grua 38-vjeçare e quajtur Vanessa LeMaistre, ka ngritur një padi në Kaliforni kundër producentit, emri i vërtetë i të cilit është Leland Wayne, duke pretenduar se ai e përdhunoi në studion e tij në vitin 2016. Si rrjedhojë, disa javë më vonë, ajo pretendon se mbeti shtatzënë prej kësaj ngjarjeje.

“Kur Wayne ftoi LeMaistre për ta vizituar atë në studiot e regjistrimit në Kaliforni, ku ajo jetonte, ajo ishte e lumtur për mundësinë për ta parë atë duke punuar sepse ishte e apasionuar pas muzikës, por më e rëndësishmja sepse muzika siguronte një shpëtim nga dhimbja që ajo kishte pas humbjes së djalit të saj të parë”, thuhej në padi.

“Megjithatë, takimi me Wayne rezultoi që zonja LeMaistre të vuante nga gjëja e dytë më e keqe që i ndodhi ndonjëherë: të përdhunohej nga dikush që pretendonte të ishte miku i saj për muaj të tërë,” vazhdonte padia.

Avokati i Wayne, iu përgjigj akuzave duke thënë se “Këto janë akuza të rreme dhe z. Wayne do të mbrohet në gjykatë”.

Sipas padisë, LeMaistre vizitoi studion e producentit në Los Angeles disa herë pasi filloi miqësia e tyre dhe sulmi i supozuar ndodhi gjatë një prej atyre vizitave në shtator të atij viti. Me atë rast, sipas ankesës, asaj “menjëherë i është dhënë alkool. Ajo gëlltiti gjithashtu gjysmën e një Xanax-i, të cilin e përdori për të përballuar ankthin pas humbjes së djalit të saj.”

LeMaistre u zgjua më vonë "plotësisht e paaftë për të lëvizur ose për të folur" pasi Wayne dyshohet se e përdhunoi atë. Padia pretendon se LeMaistre nuk e ka dhënë kurrë aprovimin e saj për të kryer marrëdhënie seksuale.

Disa javë pas sulmit të supozuar, LeMaistre zbuloi se ajo ishte shtatzënë. Padia thekson se “ajo nuk kishte kryer marrëdhënie seksuale me askënd tjetër, kështu që zonja LeMaistre e dinte se shtatzënia ishte rezultat i përdhunimit të saj nga Wayne”. Ajo zgjodhi të ndërpresë shtatzëninë për shkak të "shëndetit të saj mendor të përkeqësuar".

Për të vërtetuar pretendimet për incidentin, padia tregon tekstin e këngës "Rap Saved Me" të Wayne. Kënga ka tekst që përfshin: “Ajo mori një Xanny, pastaj i ra të fikët. Unë vij prej fundit, nuk kam pësuar asnjë ndryshim. Nga fundi më shpëtoi vetëm rap-i. Ajo më çmend/ Lind fëmijën tim.”

Tekstet e këngëve janë pranuar si prova në çështjet penale së fundmi nga prokurorët që ngritën akuzat e shantazhit kundër Young Thug mbi dhunën e dyshuar të bandës ku bënte pjesë. Kjo ka ndezur polemika mbi mbrojtjen e fjalës së lirë dhe futjen e paragjykimeve racore në diskutimet e jurisë. Prova të tilla rrallë janë lejuar në çështjet civile.

Wayne, një nga producentët më të kërkuar të rap-it, u bë i famshëm në vitet 2010 pasi bashkëpunoi me artistët me bazë në Atlanta, Future, Young Thug dhe 21 Savage, ndër të tjera. Në vitin 2022, ai krijoi kolonën zanore të “Spider-Man: Across the Spider-Verse”.

Artikuj të sugjeuar: