Unë dua t’i them të kam falur shokut tim më të mirë, që pas 9 vitesh miqësi u bë dhe i dashuri im. Do e fal, për gjithë lotët që kam derdhur për faj të tj ndonëse ndjej që më duhet edhe pak kohë për të harruar plotësisht gjithë të këqijat që përjetova prej tij. Sërish them e fala! Edhe  për herët që tentova t’i jap fund jetës sime.

Dua vetëm të harroj sa herë e gjeta veten me kokën në litar, me brisk në damar apo me thikë drejtuar zemrës. Dua ta fal për gjithë urrejtjen që më bëri të kem për veten për muaj me radhë.  Do doja shumë që ta dëgjonte se e kam falur edhe pse kur i thashë se mund të isha shtatzënë me të më tha: “Ti merru vetë me atë punë, unë dhe disa ditë dhe do iki në Itali.”

Falë Zotit testi gaboi, por pabesia e tij jo, ajo ishte e vërtetë. E kam falur, por s’e harroj dot sa herë e më ka gënjyer e sa të tjera nuk më ka besuar. Sa herë më ka thyer në mijëra copëza për krenarinë e tij. Dua t’i them që e kam falur për kohën që më shkoi dëm.

E kam falur që është egoist, i papjekur dhe fëmijë. Gjithsesi, dua që të dijë se shenjat në trupin tim mbeten akoma, por s’më dhembin më sepse dikush tjetër më bëri ta dua prap jetën. Dikush tjetër më puth në të prerat e damarëve dhe më bën të pendohem për çdo gjë i kam bërë vetes prej teje. Sot jam e lumtur dhe ndoshta sepse të kam falur. Uroj që Zoti të japë lumturi dhe për ty...

* Kjo letër është dërguar nga një vajzë anonim në inbox-in e Anabel Facebook.