MacKenzie Bezos, ish gruaja e CEO-s së Amazon Jeff Bezos, u zotua të dhurojë gjysmën e pasurisë për bamirësi. Ajo firmosi “The Giving Pledge,” një iniciativë e Warren Buffet dhe Bill Gates.

Bezos – ishi i të cilës është burri më i pasur në botë – është një nga 19 njerëzit që u bë pjesë e iniciativës të martën. “The Giving Pledge” e pati pikënisjen në vitin 2010, një ide e Buffet, CEO i Berkshire Hathaway, dhe Gates, bashkëthemelues i Microsoft.

Kushdo që firmos, zotohet të dhurojë gjysmën e pasurisë, ose më shumë, për sa kohë janë gjallë, ose në testamente. Deri tani, iniciativa ka tërhequr 204 individë dhe familje.

“Dhuratat që mund t’i ofrojmë botës na bien në duar falë një serie rastësish dhe momentesh fatlume që s’do t’i kuptojmë kurrë tërësisht,” tha në një deklaratë MacKenzie Bezos, e cila finalizoi divorcin në prill dhe përfitoi mbi 35 miliardë dollarë nga divorci.

“Përveç aseteve që më ka dhuruar jeta, kam një sasi të tepërt parash për të ndarë me të tjerët,” shtoi ajo. “Impenjimi im në filantropi do të mbetet i matur. Do të më duhet kohë, pëpjekje dhe kujdes. Por s’kam ndërmend të pres. Do të dhuroj deri kur të zbrazet kasaforta.”

MacKenzie Bezos, pasuria e të cilës vlerësohet rreth 36.6 miliardë dollarë është e 22-a në Indeksin e Miliarderëve të Bloomberg.

Ish bashkëshorti i saj, i cili nuk është zotuar të dhurojë ndonjë procion të pasurisë, ka rreth 114 miliardë dollarë pasuri dhe është burri më i pasur në botë.