Rreth 3 ditë më parë, në Anabel.al u krye një sondazh që lidhej me historinë e kësaj letre. Për ta përmbledhur shkurt: Një vajzë shumë e dashuruar shprehej se nuk e imagjinonte jetën pa partnerin e saj, por gjithashtu s'e konceptonte dot të jetonte e martuar me të.

Me pak fjalë, i trembej martesës dhe pavarësisht se lidhja shkonte mrekullisht mirë, i kishte thënë “Jo”, propozimit për martesë.

Të pyetur se çdo të bënin në një situatë si kjo, 38% e votuesëve kanë zgjedhur alternativën “E kuptoj, edhe unë ashtu ndihem”!

Bazuar në këtë përqindje, do të thotë që një pjesë e mirë i tremben martesës. Edhe nëse duan dikë, stepen para një vendimi si ky. Pse?!

Si fillim, po listojmë 5 frikërat më të mëdha që njerëzit kanë zakonisht nga martesa:

1. Frika nga divorci

2. Frika se mos një ditë nuk do ta duan më partnerin

3. Frika nga tradhtia (si nga ana e partnerit ashtu dhe nga vetja)

4. Frika e një martese si ajo e prindërve (çift i distancuar, jo të dashuruar dhe një martesë me shumë konflikte)

5. Frika nga e panjohura (Si është martesa? A do ndryshojë gjithçka për mua nëse martohem?)

Po pse njerëzit vuajnë nga frikëra të tilla dhe ç’mund të bëhet për ta kaluar këtë situatë?

Nëse do të jetonim në një shoqëri që i inkurajon çiftet të zbulojnë frikërat e tyre para martese në vend që t’i inkurajojnë që çdo kohën dhe paratë e tyre t'i shpenzojnë në planifikimin e dasmës, me siguri gjendja s’do të ishte kjo.

Kjo shoqëri duhet  t’i thoshte  çifteve: “Sigurisht që ke frikë! Martesa është angazhimi më i madh që mund të bësh dhe duke qenë dëshmitare e kaq shumë martesave pa dashuri apo konfliktuale, patjetër që do të jesh e tmerruar të hidhesh nga ky shkëmb."

Në vend të kësaj, shpesh themi: “Mëdyshja tregon që s’do. Nëse ke frikë do të thotë se diçka s’po shkon siç duhet. Ti je e fejuar me të dhe duhet të ishe më e lumtur se kurrë në këtë periudhë të jetës!”

Këtu frika normale merr një tjetër drejtim dhe e gjithë kjo kthehet në ankth që shoqërohet me pyetjet më poshtë:

“Po nëse unë nuk e dua atë mjaftueshëm?” “Po sikur të jem duke bërë gabim?”

Në fakt, edhe njerëzit që jetojnë lidhje shumë të shëndetshme dhe ndajnë të njëjtën dashuri për njëri tjetrin përballen me një frikë të tillë, që është krejtësisht normale. Ç’duhet të keni parasysh?

Këto frikëra kalojnë!

Analizoni frikërat më sipër, thuajini me zë të lartë dhe kujtoni gjithnjë shprehjen: “Ti mund të përfshihesh për të dashuruar, por s’do të dashurosh kurrë vërtetë nëse nuk angazhohesh në të!”