Mbrëmë, në "Soiree" u mblodhën një sërë njerëzish që lanë shtetet e tyre të origjinës për të jetuar në Shqipëri. Ca për punë, ca për shkollë, e ca për dashuri. Rasti i Yoshiko Shehut hyn në kategorinë e fundit. Ajo u njoh në Japoni me një djalë shqiptar, u dashurua me të dhe prej shtatë vitesh jeton në Shqipëri.
Teksa Yoshiko bënte sushi në anën tjetër të skenës – sepse ka ende vështirësi me shqipen – vjehrra e saj, Violeta Gjalpi, tregoi si e priti nusen në shtëpi.
“U njohën në Federatë, djali ka qenë në Kore tre muaj. Atje janë njohur bashkë. Vjen më thotë që jam lidhur me një vajzë. U gëzova se është djalë i vetëm. E pyeta ‘kush është’ dhe më tha që është japoneze. Ngela, u shtanga. Nuk u mërzita, u gëzova shumë, thjesht nuk e prisja,” tregon Violeta.
Edhe pse kultura shqiptare dhe japoneze janë goxha të ndryshme, Yoshiko dhe Violeta janë përshtatur shumë lehtë me njëra-tjetrën. “S’është problem as gjuha e as kultura,” thotë kjo e fundit. “Kemi ngjashmëri. Japonezët janë të përkushtuar, nikoqirë, duan familjen.”
Në shtëpinë e Shehajve hahet nga duart e Yoshikos sepse Violeta ja ka lënë në dorë asaj kuzhinën. I mësoi byrekun me fasule dhe disa gjellëra të tjera të vendit, ndërsa pjesa tjetër e gatimeve janë tradicionale japoneze.
