Aktorja e njohur indiane, Priyanka Chopra rrëfeu diçka më shumë rreth bullizmit racial që iu desh të përjetonte gjatë kohës së gjimnazit. Së fundmi, në një intervistë për “Associated Press”, 36- vjeçarja u shpreh se në shkollë të mesme, bashkëmoshatarët e trajtuan ndryshe thjesht dhe vetëm prej ngjyrës së lëkurës.

“Ndaj meje silleshin ndryshe sepse kisha lëkurë më të errët. “

Chopra pranoi se asokohe, e gjitha kjo ndikoi në vetëvlerësimin e saj.

“Kam patur pranë vetes sjelle shumë raciste. Më thërrisnin “Brownie” (lloj ëmbëlsire), “Curry” (erzë) ose më thoshnin të “shkoja sërish te elefantët, andej nga vija”, gjë që e uli shumë poshtë mënyrën se si unë e shihja dhe e vlerësoja veten.”

Priyanka, ambasadore e UNICEF shtoi gjithashtu se racizmi vjen si nënprodukt i mënyrës se si i trajtojmë njerëzit të cilët sjellin një kulturë tjetër.

“Sa më shumë të flasim rreth gjithë kësaj dhe t’u hapim njerëzve sytë duke u thënë: Nuk duhet të ndodhë kështu, besoj se shoqëria do ndryshojë [për mirë].”

Për të është shumë e rëndësishme shmangia e këtyre sjelljeve pasi nuk dëshiron që një i ri të jetojë atë çfarë ajo përjetoi dikur.

“Nuk do të lejoj njeri të ndihet më në atë mënyrë. Dua të krijoj një botë ku fëmijët e mi të mos mendojnë rreth diversitetit dhe të mos flasin për të pasi është diçka krejt normale. “

Ju kujtojmë se vitin e shkuar, aktorja u martua me Nick Jonas- in, një ceremoni që ruajti traditat e saj.