Mbrëmë, në Tel Aviv, u mbajt një ceremoni gjigante me 41 pjesëmarrësit e këtij viti në Eurovision. Të gjithë parakaluan në një tapet të portokalltë ku shfaqën veshjet glamoroze me këngët e tyre në sfond dhe u intervistuan shkurtimisht.

Jonida Maliqi, përfaqësuesja e Shqipërisë me “Ktheju tokës,” zgjodhi një krijim të Ardi Asllanit. Ajo kaloi në tapetin e portokalltë me një fustan blu elektrik, me mëngë të fryra e shpatulla të zbuluara, me detaj dominant një rrip si fasho në ngjyrat e ylberit.

Ylber? Pse ylber? Sipas intervistës së shkurtër që Jonida dha në tapet, “nëse jeta është blu, mund të zgjedhësh një tjetër ngjyrë nga ylberi [...] Jeta është si ylber.” Deklarata ka veçanërisht kuptim në anglisht, pasi “blue” (blu) përkthehet edhe në “e trishtuar.” Mesazhi aparent është diçka e tipit “lumturia është një zgjedhje.”

Situata komplikohet në këtë moment. Deklarata që lexuat më sipër u dha pasi moderatorja në tapet i tha “shohim që në fustan ke flamurin LGBT. Ç’mund të na thuash për këtë?” Edhe në përshkrimin e një videoje të shkurtër publikuar nga Wiwibloggs – blogut më të madh rreth Eurovisionit – shkruhet se Jonida Maliqi ia dedikon veshjen komunitetit LGBT.

Majin e 2014-s, Maliqi dhe 55 personazhe të tjerë u bënë pjesë në peticionin e famshëm pro familjes, kundër gay-ve ku tentuan “t’u bëhen barrë tendencave të çarjes, shkatërrimit, shfytyrimit dhe perversionit që mëtojnë të çajnë udhë në gjirin e Atdheut." Këngëtarja e mohoi më pas firmosjen e peticionit të mediatizuar si të vërtetë. Megjithatë, episodi i “Duplex” ku ishte e ftuar Maliqi mbyllet me një segment tejet homofob (min. 17:00). Pra, pse kjo zgjedhje e fustanit me ylber?

Së pari, Izraeli është goxha progresiv për sa i përket të drejtave të komunitetit LGBT dhe Tel Avivi është qyteti më mikpritës ndaj personave gay. Turizmi në këtë periudhë të vitit, që paraprin muajin e krenarisë, rritet ndjeshëm në Tel Aviv. Duke u paraqitur si aleate, Maliqi fiton simpatinë e këtij grupi demografik.

Së dyti, një sërë organizatash për të drejtat e komunitetit LGBT akuzojnë Izraelin se po përdor Eurovisionin, që ndiqet goxha nga ky komunitet, për të tërhequr vëmendjen nga krimet e luftës në Palestinë. Këto organizata apeluan bojkotimin e Eurovisionit dhe i kërkuan Madonna-s të mos performojë pikërisht për arsyen e lartpërmendur. Sërish, Maliqi vihet krah tyre përmes një rripi të thjeshtë me ngjyrat e ylberit.

Jonida Maliqi dhe ekipi i saj e dinë shumë mirë ç’po bëjnë me ylberin në fustan. Ylberi është edhe biblik, edhe simbol irlandez, edhe simbol i Afrikës së Jugut pas aparteidit, por sot është më shumë se kurrë simbol i LGBT.