Humbën prindërit pasi zjarri shkrumboi shtëpinë: 4 fëmijët jetimë kërkojnë ndihmë

Shkruar nga Anabel

14 Prill 2019

Gati një javë më parë, banesa e familjes Ndoj në Va Shënkoll në Pukë u përfshi nga zjarri. 4 fëmijët arritën të shpëtonin duke u hedhur nga dritarja; ata arritën të ndihmonin edhe gjyshen e paralizuar. Gjyshi i tyre gjithashtu mundi t’u shpëtonte flakëve, por zjarri rezultoi fatal për Petrit dhe Dana Ndojin, të cilët sipas ekspertëve tentuan të dilnin nga dhoma, por u asfiksuan.

Sot, familja 6-anëtarëshe ndodhet në gjendje të mjerueshme ekonomike, pasi nuk kanë mbi të gjitha as edhe një banesë ku të mund të jetojnë. Familja Ndoj bën thirrje për ndihmë pasi e kanë të pamundur mbijetesën në të tilla kushte.

“Si çdo natë, i puthëm mamin dhe babin, por kisha diçka në zemër që më thoshte të ndaloja. E parandjeja diçka të keqe. Vëllai i vogël u zgjua dhe pa zjarrin. Sikur dy minuta të kishim qëndruar më shumë, do ishim përfshirë dhe ne nga flakët.” – shprehet vajza e madhe e familjes, Greta, 15 vjeç.