“Dua Lipa është e ardhmja e muzikës pop” shkruhet në revistën amerikane ELLE, ku Dua është në kopertinën e muajit maj. Në një intervistë me shkrimtaren dhe editoren Lauren Levy, Dua rrëfen mbi disa nga sukseset e fundit, planet për të ardhmen, duke përmendur gjithashtu edhe vendlindjen.
“Kur fitova çmimin Grammy si 'Artistja e Re më e Mirë' pata një adrenalinë të paparë. Kur thirrën emrin tim, u bllokova. Isha shumë nervoze. Lady Gaga ndodhej në vendin e parë dhe më dhuroi një puthje nga larg. Oh Zot, truri nuk po më funksiononte. Por ia dola të thoja diçka. Do të doja të kisha folur më rrjedhshëm, por jam krenare që arrita të përshëndes të gjitha koleget e mia femra, sepse kjo ishte ajo që doja me patjetër të bëja.” – shprehet Dua në lidhje me fitoren në Grammy Awards.
Në vijim, ajo thekson se për të “është shumë e rëndësishme që të punojë për fuqizimin e grave në muzikë”. Sipas Duas, frymëzimi dhe ndikimi tek masa është një pjesë thelbësore e muzikës si art.
Sigurisht që siç ndodh në shumicën e intervistave, nuk mund të mungonte pyetja në lidhje me origjinën e saj.
“Kosova ka përcaktuar atë që jam sot. Ne kemi një ide tonën për komunitetin. Ndonjëherë njerëzit i dinë punët e tua para teje. Megjithatë më kanë dhënë shumë dashuri. Është e vështirë që të të marrin seriozisht. Kur je nga Kosova ose Shqipëria krijohet një stereotip për ty. Në filma, shqiptarët portretizohen me mafian. Po përpiqemi ta ndryshojmë mënyrën si njerëzit e shohin vendin tonë.”
Fama ka edhe efekte negative. Krejt papritur, njerëzit dhe media fillojnë dhe shkruajnë çdo gjë për ty; hera-herës komentet janë të pasjellshme, negative dhe të pavërteta. Në këtë pikë, Dua shprehet se “të famshëm ose jo, pjesa më e madhe e njerëzve bien pre e bullizmit, pasi nuk janë të paktë ata që fshihen nën një identitet të rremë në rrjete sociale”.
“Kur takova Katy Perry-n ajo më tha që të mos lexoja shumë në lidhje me gjithë ç’shkruhej për mua. Më këshilloi të çaktivizoja njoftimet, të mos lexoja lajmet. Chris Martin më tha të isha e sjellshme me veten. Në fillim m’u duk e çuditshme, por më vonë e kuptova. Të lexoj gjithçka është një formë e vetë-keqtrajtimit. Nuk kam pse lejoj mendimet e të tjerëve të përcaktojnë mënyrën si e shoh veten.”
Albumi i ardhshëm i Duas pritet të jetë një ndërthurje e disa rrymave.
“Shpresoj ta nxjerr albumin në fund të këtij viti ose në fillim të vitit të ardhshëm. Nuk e kam vendosur ende listën e këngëve që do të përmbajë. Shpresoj që të gjithë t’i këndojnë. Një ndër arsyet pse bëj muzikë është mesazhi; bëj muzikë me shpresën se dikush tjetër ndihet njësoj.”
