Jam e bindur që shumë prej jush (për të mos marrë përsipër rrezikun e të thënurit: të gjithë ju) nuk kanë as dëshirën më të vogël të dëgjojnë një intervistë shqiptare me X personazh publik. Pyetjet janë klishe, lëvdata- thurëse dhe nuk synojnë kurrsesi të nxjerrin në pah një anë "të errët", por në thelb njerëzore të të ftuarit. Megjithatë faji i dështimit të intervistave tona nuk rëndon vetëm në anën e intervistuesve, por edhe të të intervistuarve.

Kurdoherë përpiqen të duken mirë dhe të jenë në përputhje perfekte me moralin e përgjithshëm të shoqërisë. Sot, rastësia deshi të ndiqja një intervistë me Bledi Strakoshën në “Thumb”, që t’ju them të drejtën ia doli të më tërhiqte vëmendjen.

Po dëgjoja se si një figurë e njohur fliste pa komplekse rreth tradhtisë, e përkrahte, pranonte se kishte tradhtuar, pa e vrarë shumë mendjen se si do dukej apo tingëllonte e gjitha kjo te publiku. Sipas këndvështrimit të tij, “tradhtia është një vlerë që e shton dashurinë, për aq kohë sa është thjesht diçka seksuale”. Për Bledin, të qenurit në një marrëdhënie të konsoliduar apo martesë nuk përjashton faktin e të paturit nevoja apo dëshira seksuale, ku këto të fundit janë thjesht diçka momentale dhe mbyllen me aq. Kjo nuk ka të bëjë fare me faktin se sa e do ose jo partnerin/en tënd/e. Ndonëse kushdo e vetëpërcakton se çfarë është e moralshme ose jo, të paktën Bledi na tregoi me zë e figurë se tradhtarë ka edhe në botën e famës (po ka) dhe se për të tradhtia s’ka asgjë të gabuar. Sepse çfarë është turp për ne, s’është për Bledin. Big up- i i parë!

E meqë ishte këtu, Bledi sqaroi se në shoqërinë tonë ndodh diçka “tepër mbytëse”, nëse mund të shprehemi kështu. Është i vështirë të konceptohet raporti “thjesht seks”. Përkundrazi, të nesërmen, pas një nate pasionante, siç Bledi u shpreh “ata lidhen, nisin mesazhet: Ku je, pse s’më shkruan; kur do takojmë prindërit?” e kështu me radhë.

Më pas, biseda u zhvendos te pija.

Për këdo që s’është në dijeni, kur Strakosha pi seç i lindin disa mendime e ide perverse.

Po, e tha vetë!

Dy herë big up...

Gati për të tretin? Moderatori pranoi se nuk ia thotë për të gjuajturën. Shkurt, ka përshtypjen që s'di të flirtojë fare po fare ama.

“Jam indiferent. Kryesisht dal me grupin tim, me shoqërinë time dhe njerëzit mendojnë se jam mendjemadh.”

Po kështu tregoi se kur ka konsumuar për herë të parë hashash, ç’paranoja i dha herën e fundit që e piu (arsye prej së cilës s’po pi më) si dhe përse do kafshët më shumë se njerëzit.

“Janë si fëmijë, naivë, të drejtë.”

Sado që skeptikët mund të kapen pas vlerave që kjo intervistë tejçon (cekje e temës së drogave apo "promovimi i tradhtisë", ndonëse njerëzit as nuk do pinë e tradhtojnë më shumë pas këtyre fjalëve të Bledit) të paktën veshët na dëgjuan diçka ndryshe. Shihemi në shkrimin e radhës!