Akademia Europiane e Filmit ka bërë pjesë të saj aktoren e njohur shqiptare nga Kosova, Ilire Vinca, e cila ka një karrierë të pasuri si aktore e filmit, teatrit dhe profesoreshë e aktrimit në Universitetin e Prishtinës.

Lajmin e ka bërë të ditur Ministria e Kulturës, Rinisë dhe Sportit në Kosovë, përmes një deklarate zyrtare.

“Përderisa kufinjtë na ndajnë, arti na bashkon pa dallim race e gjinie, ashtu siç janë ndjenjat dhe e vërteta. Jam e nderuar të jem anëtare e Akademisë Evropiane të Filmit” u shpreh aktorja.

Ilire Vinca u bë e njohur edhe si aktorja e parë që mori pjesë në Berlinale me filmin “Falja e Gjakut” në 2011-n, pastaj edhe me filmin “Burrneshat” në 2015-n sërish në Berlinale. Disa nga filmat e saj më të fundit janë “Zana”, “Pranverë e paharruar në fshatin e harruar”, “Gardhi” dhe “Martesa”.

Akademia Europiane e Filmit (EFA) u krijua në vitin 1988 nën emrin Shoqëria e Kinemasë Europiane, e themeluar nga regjisori suedez Ingmar Bergman dhe 40 kineastë të tjera nga Europa për të promovuar kulturën europiane të filmit në të gjithë botën dhe për të mbrojtur interesat e kësaj industrie. Fillimisht, numri i anëtarëve ishte vetëm 99, por me kalimin e viteve u zgjerua dhe për momentin janë më shumë se 3,300. Vinca nuk është e para aktore nga Kosova që përzgjidhet nga EFA dhe referuar informacionit në Wikipedia, në të bëjnë pjesë 23 anëtarë nga Kosova.