Teksa isha në kërkim të lajmit të radhës ndesha reagimin e Fifit përsa i përket deklaratës së Mentor Hazirit mbi stonimin e artistes. Fiks ajo që po kërkoja: përplasje artistësh, lexuesit i duan “sherret” dhe e gjitha kjo përkthehet në sa të duash klikime. Ndërkohë që shkruaja atë që Fifi kishte preferuar të përdorte si argument për t’u kundërpërgjigjur hasa këtë rreshtin këtu:
“Po më vjen keq që një artist merret akoma me diçka që ka kaluar dhe nuk merret me projekte po me llafe si gratë. Mbi të gjitha je mashkull.”
T’ju them të drejtën më tërhoqi vëmendjen, madje tani që e mendoj mirë më revoltoi mjaftueshëm për të mos e lënë postimin në fjalë në stadin e raportimit të thjeshtë. Më duket e patolerueshme, ose më mirë naive t’i thuash një burri të shkojë të bëjë gjëra për së mbari duke mos bërë atë që thuhet se bëjmë vetëm ne gratë; fjalë, fjalë, fjalë! Nuk e pandeh veten feministe (të paktën kështu mendoj), por as nuk shoh më të voglën arsye që në debat e sipër (dhe jo vetëm) t’i jap palës kundërshtare luksin e nënvlerësimit të vetes sime, nga vetë unë.
Përpara se të ngjyrosim pankarta gjigante në 8 Mars apo të shqipërojmë fjalime frymëzuese nga X ose Y grua e famshme në botë, të jemi të kujdesshme fillimisht për mënyrën se si i referohemi llojit tonë. Dhe jo, kjo nuk ka të bëjë personalisht me Fifin, ndonëse fati deshi që Fifi ta shkruante e zeza mbi të bardhë dhe sa mirë bëri! Ndryshe s’do të na shkonte kurrë në mendje të kujtoheshim për refrenin e përjetshëm “gratë merren me llafe”, që e përdorim pa problem në sy të burrit, të të dashurit apo kolegut dhe në fund të ditës ankohemi që na thanë se merremi me llafe. Si guxuan njëherë!
Dyshoj që një burrë në rrethanat e Fifit të vepronte njësoj si ajo, të përgjigjej me vetëqortim. Duhet të kuptohet se problemi nuk qëndron ekzaktësisht te veprimi (fundja kush tha se është keq apo mirë të merresh me fjalë) sesa te konotacioni i të thënurit që nënkupton diçka të gabuar. Ky cen supozohet të jetë karakteristikë e botës femërore, që një burri s’i ka hije. Shtoji kësaj edhe faktin se e gjitha kjo u tha nga një grua vetë. E tmerrshme!
Më të kujdesshme herën tjetër. Deri atëherë, shihemi në gafën e radhës.
PS: Edhe burrat merren me llafe. Të paktën ata që njoh unë!
Shkruar nga Denisa Skodi
