Pas publikimit të këngës “Ring Ring”, së shpejti Tayna do të sjellë një tjetër projekt, për të cilin ka dhënë disa detaje përmes një postimi në Instagram.

Duket se reperja do të trajtojë në mënyrën e saj fenomenin e bullizmit, të paktën kështu lë të kuptohet deklarata e mëposhtme:

“Unë takova Besim Hajrën, njëri prej djemve të videos ‘A bon me fol’. Besimi ishte një ndër njerëzit më të sjellshëm dhe të dashur që kam takuar. Ai më tregoi për talljet dhe siç e dimë të gjithë, historia nuk ishte aspak e këndshme. Më vjen shumë keq për ato që dëgjova dhe besoj që edhe juve. Për të bërë një ndryshim, unë vendosa të përdor fjalën e lartpërmendur në këngë dhe ta shndërrojmë atë në diçka të këndshme që kjo histori të marrë një kah tjetër. Besimi tha se është dakord, Iliri gjithashtu.”

Pak kohë më parë, Iliri dhe Besimi ishin protagonistët e një videoje që u bë virale dhe brenda pak kohësh u kthyen në meme. “A bon me fol” është pyetja që Besimi i drejtoi gazetares, në përpjekje për të marrë të drejtën e fjalës.

Djemtë ranë pre e bullizmit virtual, megjithëse nga ana tjetër u përkrahën nga një pjesë e mirë e njerëzve, të cilët reaguan ashpër duke thënë se “të marrësh leje para se të flasësh është veprim i sjellshëm, tregon etikë dhe në asnjë moment nuk meriton që të kthehet në tallje.”