Paçka se fillimisht u njoh si vëllai i Beatrixit ose nipi i Albërie Hadërgjonajt, me kalimin e viteve arriti të krijojë një identitet të vetin duke u njohur thjesht si Alban Ramosaj. Ai është një ndër të paktët artistë shqiptarë që preferon të mos i lagë këmbët në ujrat e muzikës komerciale edhe nëse ky vendim përkthehet në mungesë miliona klikimesh në YouTube.
Megjithatë, për aq kohë sa klikimet nuk janë domosdoshmërisht vlerësuesi më i saktë i artistëve, Albani ia ka dalë që të jetë i veçantë në llojin e vetë.
E fillojmë me stilin e të veshurit: Dallohet për stilin retro all James Dean. Xhaketat e lëkurës, xhinset e grisura, kambalet, kapelet etj, janë fjalët kyçe për stilin e tij. Mungon vetëm një motor, por… kaq, kaq për momentin.
Vazhdojmë tani me një tjetër çështje. Duket se këngëtari nuk i thotë “jo” asnjë eksperience. Fillimisht e pamë në “X Factor” në vitin 2012, ku edhe pse ende i vogël, u vlerësua nga juria për stilin e tij.
“X Factor” do të pasohej më pas nga “The Voice of Albania” dhe një Alban me flokë bjondë. Kënga “Like a Virgin” e bindi Aurela Gaçen dhe Alma Bektashin të shtypnin butonin.
Madje jo vetëm kaq, por 3 vite më parë, Albani provoi edhe kërcimin pasi pranoi të merrte pjesë në spektaklin “Dance with me” në Tv Klan.
Së fundmi, ai është pjesë e sezonit të dytë të “Hostel by Anabel”, ku do të tregojë ndër të tjera edhe talentin e fshehur në aktrim.
E fundit, qershi mbi tortë: Muzika! Siç e thamë edhe më sipër, Albani qëndron larg këngëve të zakonshme, duke i dhënë rëndësinë e duhur tekstit, vijës muzikore dh sigurisht videoklipeve. Prej kohësh, ai është përpjekur të krijojë një stil të vetin, disi vintage, që mesa duket ndihet mirë.
E veçanta e muzikës së Ramosajt është mënyra si konceptohet gjithë produkti final. Këngët e tij janë mini-filma, që transmetohen përmes një triologjie. E para ishte “Po nëse…” (“Çkemi”, “A më do”, “Aurora”), ndërsa së fundmi ai ka publikuar edhe pjesën e tretë të “Hiraeth”, “Ëndrrat e mia”, krahas “Ike” 1/3 dhe “A thu pse” 2/3.
Hiraeth - fjalë që nuk ka përkthim të drejtëpërdrejtë; është një emocion midis nostalgjisë dhe mallit për një shtëpi që nuk mund t’i kthehesh më, një shtëpi që dhe mbase nuk ka ekzistuar kurrë.
Projektet e tij kanë qenë herë të thjeshta e herë të ndërtuara si filma, me elemente të prekshme, artistike dhe jo ekstravagante. Ndryshe nga ç’dëgjojmë rëndom, këngët e artistit janë një paketë që mbështjell emocionet, mendimet dhe përjetimet sesi nis, si përfundon dhe ç’lë pas një ndjenjë si dashuria.
Copyright Anabel.al / Ndalohet ribotimi pa lejen e redaksisë.
