Dy ditë më parë, Roberto Cavalli, personi, postoi disa komente fyese në një foto të blogeres italiane, Chiara Ferragni. Sot, Roberto Cavalli, firma, i kërkoi falje.
Chiara postoi në Instagram Stories letrën që i dërgoi Paul Surridge, Drejtori Kreativ i Roberto Cavalli që nga maji i vjetshëm. “Kur drejtori krativ i Roberto Cavalli të dërgon lule dhe një letër për të kërkuar falje për komentet e tmerrshme lënë në llogarinë time nga Roberto Cavalli,” shkruan Chiara në një foto.
Në tjetrën, lexohet qartazi kërkesa për ndjesë nga Paul Surridge.
“Në emër të gjithë kompanisë Roberto Cavalli, dua të të kërkoj ndjesë për komentet e postuara në llogarinë tënde në Instagram.
Si Drejtor Kreativ, dua që të shpreh admirimin tim për ty, si një profesioniste dhe si nënë. Je një shembull i jashtëzakonshëm për vajzat dhe dua të të uroj sukses dhe lumturi në të ardhmen.
Shpresoj që së shpejti të t’i them të gjitha këto në person. Po bën një punë të shkëlqyer. Vazhdo kështu.
Me dashuri për ty dhe familjen tënde.”
Roberto Cavalli e quajti Chiara-n “makinë parash”, i tha se “nuk ka as dashuri, as spontanitet në atë që bën” dhe se nuk e kishte ushqyer të birin me gji, nga frika se mos i prishej gjoksi. Vetë ai nuk ka reaguar në lidhje me incidentin.
