Pak ditë pas deklaratës së kryeministrit Rama se që prej 1 janarit s’do të ngrihet asnjë qepen bastesh në vend, zbardhet ndryshimi në ligj që do të bëjë të mundur pikërisht këtë. Sipas Top Channel, subjektet “Baste sportive” dhe “Baste për garat në pistë” do të ushtrojne aktivitetin deri në 31 dhjetor 2018. Aplikimet për pajisjen me licencë do të ndërpriten. Nëse ky propozim miratohet, në vend mbyllen rreth 4500 pika bastesh.

Sipas të dhënave të Qendrës Kombëtare të Biznesit, në Shqipëri ka një pikë bastesh për 730 banorë, një raport relativisht i ngushtë. Në 2017-n, shqiptarët luajtën plot 130 milion euro nëpër kazino dhe baste sportive.

Pasojat

Mbyllja e pikave të basteve dhe kazinove sjell rënie të të ardhurave në buxhetin e shtetit. Qeveria mbledh 40 milion euro nga taksat e biznesit, por sipas Top Channel, efekti i kësaj vlere është i papërfillshëm.

Së dyti, 4,500 pika bastesh punësojnë minimalisht dy njerëz. Prej 1 janarit, mbi 9,000 njerëz do të mbeten të papunë.

Reagimi

Komunitetet fetare shprehën mbështetjen e tyre ndaj nismës së kryeministrit Rama duke argumentuar se lojërat e fatit janë kthyer në një sëmundje për familjet shqiptare.