Një muaj më parë, “Fiks Fare” zbuloi se shoqata me emrin “Ferdinand Deda” ishte një skemë për të prostituuar vajza në Maqedoni. Ferdinand Deda, dirigjent i njohur, është babai i ndjerë i muzikantit Elton Deda. Deda reagoi ashpër kur mori vesh lajmin, krejt rastësisht.
Dje, i ftuar në emisionin e pasditës në Tv Klan, bashkë me Redon Makashin dhe Aleksandër Gjokën, Deda tregoi hapat që ndërmori pasi mësoi për ekzistëncën e shoqatës dhe aktivitetin e saj:
“Unë jam interesuar në gjykatë. Shoqata fatmirësisht është pezulluar. Kam çuar një kërkesë që në të ardhmen, kushdo që do të hapë një shoqatë në emrin e Ferdinandit, duhet marrë aprovim nga familjarët. “
Sipas Dedës, problemi nuk qëndron vetëm tek njeriu pas shoqatës dhe aktivitetit, sepse sipas tij, njeriu e zgjedh vetë rrugën në jetë, e zgjedh vetë mënyrën për të fituar para.
“Për mua, problemi qëndron te gjykatësi që nuk i kërkoi këtij njeriu autorizim nga familjarët. Mami është, unë jam, motra është. Ne jemi gjallë. Që nga ky gjykatës nis problemi. Këtu është kalbëisra, që në sistem.”
Shoqata është pezulluar, personi përgjegjës është pas hekurave. Së shpejti, emri i Ferdinand Dedës do të hiqet nga regjistrat dhe fytyra e tij do të hiqet nga vula.
“Kam një opinion shumë regresiv për gjykatësit,” përfundoi Deda.
