Lajmi se shtëpia italiane e modës, Versace do t’i shitet markës së njohur amerikane Michael Kors për 2 miliardë dollarë ka zemëruar qindra njerëz.

Ndonëse shitja nuk është bërë ende zyrtare nga palët në fjalë, fansat e markës së famshme janë rebeluar dhe nuk kanë ngurruar ta shprehin kundërshtimin e tyre ndaj këtij vendimi.

“Mos lejoni M. Kors-in të blejë as 1% të Versace-s. Do ta shkatërrojnë. Do ta vrasin.”- shkruan dikush.

“Nëse Michael Kors blen Versace-n do të jetë me siguri një nga gjërat më të këqija që do t’i ndodhë botës së modës së lartë. Michael Kors është markë luksoze, por Versace përfaqëson elegancën dhe klasin. Rroba dhe aksesorë që flasin për ty.”- shkruan një tjetër në Twitter.

Të tjerë, e kanë quajtur këtë si mungesë respekti ndaj themeluesit të Versace-s, Gianni-it i cili ndërroi jetë në 1997-ën.

Gjithsesi, pavarësisht kësaj, përgjigja përfundimtare, sipas mediave botërore pritet të jepet brenda kësaj jave.