Aktori i njohur i humorit, Fadil Hasa është ndarë nga jeta në moshën 78-vjeçare. Hasa, ka ndërruar jetë pas një beteje të gjatë me një sëmundje të rëndë në mushkëri.

Fadil Hasa mban titullin “Artist i Merituar” dhe ndërsa ka marrë 4 herë titullin “Artisti më i mirë”.

Komeditë, skeçet, paroditë dhe format e tjera të humorit në të cilat ka marrë pjesë gjatë gjithë jetës së tij artistike janë pafund.  Sado vite të kalojnë, shqiptarët gjithnjë do ta mbajnë mend aktorin në shumë role të tij, si Lushi në “Sheqer sheqer”, Rrema tek “Or ti i kshillit”, “Mysafir i paftuar”, “Qyli” e shumë të tjera.

Përveç tyre, humoristi i Durrësit, ka luajtur edhe në filma artistikë si Zëvendësi i Grave (1987), Mao ce Dun (2007), Kronikë Provinciale (2009) janë vetëm disa filmat të cilat shqiptarët i mbajnë mend më së miri, pavarësisht viteve.

Homazhet për humoristin e njohur, priten të zhvillohen nesër në qytetin e Durrësit, në Teatrin e qytetit, "Aleksandër Moisiu”.