Përmes një deklarate zyrtare, FIFA njoftoi se do të niste procedurën disiplinore kundrejt Granit Xhakës, Xherdan Shaqirit, zvicerianit Stephan Lichtsteiner, që bëri shqiponjën me duar, dhe Federatës Serbe të Futbollit nisur nga mesazhet politike dhe fyese të tifozëve serbë.

Në të tilla situata, futbollistët dënohen duke u përjashtuar nga ndeshjet e ardhshme, megjithatë duket se gjërat kanë shkuar mirë. Xhaka dhe Shaqiri janë dënuar me një gjobë simbolike, 10 mijë franga zviceriane, ndërsa zviceriani me vetëm 5 mijë. Festimi i tyre duke bërë shqiponjën me duar nuk është konsideruar si provokim politik nga FIFA, thjesht gjest josportiv.

Nga ana tjetër, Federata Serbe e Futbollit është gjobitur me 54 mijë franga zviceriane me argumentin se tifozët serbë shfaqën postera diskriminues dhe hodhën objekte në fushë.