Majin e këtij viti, djali i vetëm i shkrimtares Flutura Açka u nda nga jeta në moshën 18-vjeçare pas një beteje me një sëmundje të rëndë. Açka iu përgigj lumit të ngushëllimeve online me anë të një statusi dy javë më vonë, duke injoruar deklaratat e Genta Kaloçit. Kaloçi, e cila u kthye në fenomen, tha se vdekja e djalit të shkrimtares ishte drejtësi, por jo fatkeqësi.

Një tjetër kontroversialitet godet rrjetin për të njëjtën çështje, kësaj here nga Edison Ypi. Në një status në Facebook, gazetari tha:

“Më mirë të kishte vdekur Flutura Açka se djali i saj, i cili nuk do të shkruante vargje mediokre për nënën e vdekur, që do tëi shte ekuivalente me përdhosjen e artit, pra me mijëra nëna dhe mijëra bij të vdekur.”

Poezia në fjalë është publikuar nga Açka pak ditë më parë.

"Roja i dritës

Ti kishe kaq qiell brenda teje,
sa dhe dielli bante ndejë n'tandin sy,
e drita xhelozohej kur fikej mramjeve,
horizontit ankohej,
se s'mundej me të ngja ty.
Kurdisur n'buzëqeshje
kraharori yt ende jep gurgullimë,
andrrës dhe zhgjandrrës të çajë thurjen e pezmët
të trishtimit tonë, mësyn.
Është larg, n'rini të përjetshme,
mbretërinë e Askundit lyen me bojë njeriu,
i pakorruptueshmi shpirt,
i papërlyemi kurm,
e pavramja ndjenjë,
xeherore qe s'e prek kush thellimave,
ekzistencë diku, gega im,
"the terrible beauty"* në më t'gjatin mërgim.
Ti dashuria që ecje,
ti buzëqeshja baretëse,
ti i thikti rrezatim mirësie,
kushedi në ç'mors lexon tani,
vajin tonë që lutet për kthim.
Ti roja i dritës,
përgjon errëtitë që aviten të na nxijnë,
të na derdhin mjerim.
Tani shkel në dhera të pastra,
e ëndrrash të qashtra shtigjesh nget,
ti nezra e përjetshme,
nuk fikesh si kandil,
as flakë qiriri topitur erës,
shembëllim i largët i një ylli kushediku,
tatuazh i shpirtit mbet...

"The terrible beauty" (bukuri mizore), varg i John Keats"

Ju lëmë në shoqërinë e “Tears in Heaven” nga Eric Clapton, e cila u shkruajt pasi djali i tij katër vjeçar gjeti vdekjen nga rënia nga kati i 50 i një ndërtese në New York. Kështu tingëllojnë përdhosjet?