Më shumë se një muaj nga protesta e fundit, lëvizja “Për Universitetin” organizoi një tjetër. Me anë të një postimi në faqen e tyre të Facebook, aktivistët lajmëruan studentë dhe mbështetës së kauzës të mblidhen sot, në orën 11:00, për një marshim nga godina e Universitetit Politeknik, drejt Kryeministrisë.

Por ç’kërkon kjo lëvizje studentore?

Si fillim, kërkojnë përgjysmimin e tarifave studimore në të gjitha nivelet dhe degët e studimeve, për “heqjen e diskriminimit ekonomik”. Kërkojnë eleminimin e pagesave ndaj institucioneve private për çertifikimin e gjuhës së huaj. Kërkojnë heqjen e pagesave të dyfishta për kreditet e provimeve të mbartura (nëse një student rifutet në një provim të mbartur nga vitet e mëparshme duhet të paguajë një tarifë fikse për çdo kredit që ka lënda në fjalë).

Një tjetër motivacion i kësaj proteste është qëndrimi në godinën e tij historike Fakulteti i Gjeologji Minierave.

Po në Facebook, lëvizja postoi një tabelë që shfaqte rritjet e tarifave të studimit ndër vite dhe argumenton se “që prej fillimvitit 2015, kur Lëvizja për Universitetin u fuqizua mjaftueshëm për të kundërshtuar reformën klienteliste në arsimin e lartë, qeveria nuk ka guxuar t’i rrisë më tarifat e studimeve në universitetet publike”.

Pas marshimit, studentë aktivistë dhe mbështetës së lëvizjes mblodhën firma për të plotësuar për t’i dhënë jetë tre kërkesave me karakter ekonomik. Pra përgjysmimit të tarifave studimore kudo; heqja e pagesave për çertifikimin e gjuhës së huaj; heqja e pagesës në bazë kreditesh për provimet e mbartura.