Dy motra nga New Jersey po organizojnë një sfilatë “anti- Victoria’s  Secret”, që do të mbahet nesër ku do të marrin pjesë gjithë ‘modelet’ jo modele.

Vajzave të quajtura Alyse dhe Lexi iu lindi ideja pasi panë shfaqjen e vitit të kaluar dhe donin me çdo kusht të krijonin diçka për të promovuar pozitivitetin e trupit.

Ndonëse kanë qenë gjithë kohës fanse të eventit të famshëm, kësaj here zgjodhën të krijonin versionin e tyre të sfilatës.

“Donim të ishim vetë ëngjëjt, por e dinim që kjo do të ishte e pamundur.”- u shpreh njëra prej tyre.

Për ta realizuar këtë projekt, motrat zgjodhën 21 vajza për pasarelën.  Vajza të peshave të ndryshme, në karrige me rrota apo dhe me këmbë protezë, pranuan të ishin pjesë e sfilatës me qëllim për të dhënë një mesazh sensibilizues. Mësohet se modelet e zgjedhura për eventin u rekrutuan nga miq, familjarë dhe rrjete sociale.

“Çdo vit ne shohim shfaqjen e Victoria’s Secret dhe fillojmë të krahasojmë veten me modelet aty. Dhe mendon që kurrë s’do të dukesh si ato, pavarësisht çdo përpjekjeje.”-  është shprehur Alyse, e cila tregon se ka ndërmend të vazhdojë me këtë traditë edhe vitin e ardhshëm, që të gjithë vajzat, sido qofshin, ta duan trupin e tyre.

Burimi: The Independent