Perlat janë një aksesor ikonë dhe është thuajse e pamundur të gjesh dikë që nuk zotëron një varëse, byrzylyk a vathë me perla. Sidomos së fundi po rikthehen kudo, jo vetëm si bizhuteri, por edhe si dekorime në bluza apo këmisha. Ngaqë janë kaq popullore, perlat janë kthyer në një nga gurët më lehtësisht të imitueshëm. Ama, ka një mënyrë për t’i dalluar të vërtetat nga falset.
Vëzhgojini imtësisht
Është e pamundur të imitohet fije për pe tekstura e një perle origjinale. Me anë të një lupe, vëzhgoni imtësisht sipërfaqen e perlave tuaja. Origjinalet janë më të buta, më të lëmuara, ndërsa falset ngjasojnë me një lëvozhgë veze. Kjo vlen edhe për perlat natyrale, edhe për ato të kultivuara.
Ekzaminoni formën
Imperfeksionet e vogla i japin perlave personalitet. Është thuajse e pamundur të gjesh një gur tërësisht të rrumbullakët. Perlat origjinale jo vetëm që s’janë sferike dhe pa gunga, por as që ngjajnë me njëra tjetrën në madhësi.
Gërvishtni sipërfaqen
Me majën e një thike, krijoni një çarje të voël fare mbi sipërfaqe. Një perlë e vërtetë do të lëshojë pluhur ose pudër, ndërsa ato false do të zbulojnë xhamin nën larje. Nëse përdorni këtë metodë për të testuar perlat tuaja kini kujdes me vendin ku gërvishtni. Zgjdhni një zonë ku nuk do të duket.
Hidheni nga një lartësi
Një metodë çuditërisht efektive është testi i hedhjes. Merrni perlën tuaj dhe hidheni nga 60cm lartësi në një sipërfaqe xhami. Perlat e vërteta do të kërcejnë lart deri në 30cm, ndërsa imitimet goxha më pak. Sigurisht, kjo metodë vlen për gurë të veçuar dhe jo për bizhuteri të tëra.
Burimi: Who What Wear
