Nje punonjëse pranë maternitetit të Kukësit tregon se një nënë braktisi fëmijën pasi pa se ai kishte lindur i deformuar. Sipas saj nëna ka thënë se fëmijën “e ka sjellë shejtani” dhe ka ikur.
Në inbox-in e Anabel erdhi thirrja për ndihmë nga një familjare e të punësuarës që na tregon se fëmija ka mbetur i vetëm dhe pa askënd që të mund ta ndihmojë.
“Fëmija nuk ka buzë, sytë i ka të ngjitur, ka vetëm 6 gishta, siç e shikoni në foto. Si nënë që jam, më plasi zemra, të them të drejtën më erdhi gjynah, por nuk kam mundësi ta ndihmoj.”, na shkruan ajo., “Për momentin nuk ka ndihmë nga asnjëri, përveç që me kushtet e maternitetit të Kukësit, që janë minimale.”
Por të tjera burime pranë spitalit thonë se nëna nuk e ka braktisur, por është vetë në gjendje të vështirë shëndetësore dhe nën kujdesin e mjekëve.
Në fakt, të tilla deformime nuk kanë të bëjnë me “shejtanin”, por janë anormalitete të zhvillimit të fetusit, që gjatë muajve në barkun e nënës, për një arsye apo një tjetër nuk rritet si një foshnje e zakonshme.
Ndonëse janë raste të rralla, njihen anormalitete si ai i arinisë kongjenitale, kur fëmija lind pa hundë. Deri më tani janë raportuar 30 raste të fëmijëve të lindur pa hundë. Në qershor humbi jetën 2-vjeçari Eli Thompson, i cili kishte habitur mjekët sepse ia doli të jetonte më gjatë se ç’pritej.
Pavarësisht mungesës së hundës, prindërit e tij e quajtën “një mrekulli”.
