Në valën e hiteve që rikrijojnë këngët e njohura shqiptare, Capital T dhe Mixey në qershor publikuan këngën “Hatixhe”.
Kënga përmban fragmente nga “Hatixhja origjinale”: kënga “Moj Hatixhe, n’shami t’kuqe” u këndua nga Hamide Sadiku në 1971-shin dhe u publikua më tej në një disk që përmbante edhe dy këngë të tjera të këngëtares, të shoqëruara prej saj me def.
Edhe pse “Moj Hatixhe, n’shami t’kuqe” është ndër këngët më të njohura folklorike kosovare, pas suksesit të “Hatixhes” së Capital T, versioni origjinal ka kaluar 2 milionë klikimet.
Komentet në videon e publikuar nga llogaria e Youtube-it me emër UddichSchmuddich tregojnë se shumë njerëz e kanë kërkuar këtë këngë pasi kanë dëgjuar variantin e rikrijuar nga Mixey.
“Like kush ka ardhur këtu vetëm prej Capital T-së”, shkruan një prej komentuesve të shumtë.
E në fakt, në bazë të sajtit Socialblade, që prej qershorit kanali në Youtube që ka publikuar këngën e Hamide Sadikut ka patur një ngritje të menjëhershme në numrin e shikimeve të videove.
Teksti i “Moj Hatixhe, n’shami t’kuqe” rrëfen trishtimin e një nëne, së cilës po i martohet e bija dhe për dasmën ia “ngjyen flokët e kuqe”. Tani që e bija “shkoj te burri”, nëna mbetet vetëm me babain dhe dy vëllezërit dhe ndjen se e kapi pleqëria.
Kurse “Hatixhja” e Mixey-t me Capital T-në flet për një dashuri të pamundur të kohëve moderne, kur Hatixhja ka një të dashur, edhe pse i shkruan në Snapchat djalit që do në të vërtetë.
Dy vitet e fundit janë publikuar një sërë këngësh që kanë rikrijuar hite të vjetra kosovare, siç është, shembulli më klasik, “Era” e MC Kreshës, një remake i këngës “Era” të grupit Gjurmët. Këtë verë, në një kohë me “Hatixhen” u publikua edhe “Simpatia”, një risjellje e këngës së famshme të Edona Llalloshit me Memlin, nga Dhurata Dora dhe Lumi B.
Copyright Anabel.al / Ndalohet ribotimi pa lejen e redaksisë.
