E ftuar në programin “Rudina”, në Tv Klan, ka qenë bashkëshortja e ish-kryeministrit të Kosovës, Ramush Haradinaj. Në një rrëfim mbi jetën e saj me Ramushin, fëmijët dhe sfidat e njëpasnjëshme Anita ka përcjellë mesazhe force për të gjitha gratë shqiptare. E pyetur se si po e përjeton gjithë këtë histori dhe se si ka qenë jeta e saj nën ankthin e pritjes, ajo është përgjigjur se është bërë e fortë.
“Jeta është e lodhshme, çdo ditë ka sfida të reja në çdo aspekt, por lotët s’më janë harxhuar. Kur humba nënën nuk munda të qaj dhe dyshoja në vete nëse kam më ndjenja apo jo. Dhe kur ndodhi kjo me Ramushin doja kaq shumë të qaja, por se bëja, nuk doja të mërzisja fëmijët,” shprehet ajo.
Përpos televizionit, i cili është një pjesë e pandashme e Anitës, ku punon si spikere në RTK (Radio Televizioni Kosovës), ajo është e angazhuar gjithashtu edhe në një biznes të saj i cili lidhej me fushën e marketingut.
Edhe pse aktivitet e saj ditore zënë pjesën më të madhe të ditës, zonja Haradinaj tregon se ka patur momente në të cilat ka menduar se nuk mundej më, dhe se çdo ditë pritjeje ishte një sfidë e re. “Mua nuk më dhimbsen fëmijet dhe vetja ime, më dhimbsen gjithë fëmijët dhe Anitat e Kosovës,” vazhdoi ajo e cila plot siguri rrëfeu se Ramushi do të bëntë të pamundurën për ta siç ka bërë gjithmonë.Ndër të tjerash ajo ka folur dhe për ish-gjeneralin e UÇK-së jashtë kornizave të burrit të shtetit.
“Ai është kaq punëtor, është bashkëshort i mirë dhe më jep siguri. Kur je afër tij, bota është e jotja, këtë kam ndjerë kur e takova herën e parë,” pohoi ajo.
Të martuar që në vitin 2003, Anita ka ndarë me shikuesit foto ekskluzive nga dasma e tyre.
Në fund të intervistës, Anita u dha femrave një mesazh force, dhe vullneti. “Ato janë kaq të fuqishme, dhe e gjitha gjendet brenda tyre,” përfundoi ajo.
