Katër vite pas ndarjes, Shpat Kasapi ka treguar se nuk ka asnjë arsye për t'i mbajtur mëri ish të dashurës së tij, modeles Afërdita Dreshaj, përkundrazi, e ka marrë malli për të. Në puntatën e fundit të spektaklit "Your Face Sounds Familiar", këngëtari u prezantua me këngën "Let's Twist Again" të Chubby Checker.
Në klipin e realizuar gjatë provave me mentoren e tij Olta Gixharin, Shpati tha se këngën ia dedikonte ish-të dashurës së tij. Ishte Olta ajo që nisi gjithçka, pasi në përpjekje për të zbërthyer profilin e Chubby Checker, tha se ai ka qenë i lidhur me Miss Botën, ndaj kishte dhe një lloj vetbesimi që i ndodh mashkullit kur ka në krahë një femër të bukur. "Edhe unë e kam patur Miss Kosovën...Hajd se po ia kushtojmë asaj," tha Shpati, duke iu referuar, Afërditës, të dashurës së tij prej 6 vitesh.
Të njëjtën deklaratë e konfirmoi edhe pasi u ngjit në skenë. "A është e vërtetë që ia dedikon këtë këngë ish-it tënd më të bukur që ke patur?" e pyeti Arian Çani dhe Shpati jo vetëm e pohoi, por në pamundësi për ta patur atë në krahë, duke qenë se jeton në Amerikë, thirri në skenë Albërie Hadërgjonajn si një zëvendësuese të denjë.
