Alketa Vejsiu kthehet sonte në studiot e Top Media-s, pas 16 vitesh. Moderatorja e njohur ende mbahet mend për emisionet e saj në Top Albania Radio, ku nisi karrierën kur ishte fare e re, vetëm 14 vjeç.
Këtë e bëri të ditur vetë Alketa në Instagram-in e saj, ku njoftoi se do të jetë pjesë e panelit të të ftuarve në transmetimin live të çmimeve Oscar në Top Channel, drejtuar nga Ledion Liço.
Alketa pohon se ka qenë ai që e shtyu të shikonte filmat e kandiduar për çmime këtë vit, duke e falenderuar kështu publikisht:
“Është një nga të paktat gjëra që më bën të sakrifikoj gjumin...Po nisa të shikoj një film që vlen, mund të shoh dy, tre, edhe katër rresht deri sa zbardhë dita.
Kështu që një natë pa gjumë për Oscars në Top Channel, më ka shumë kuptim! Do jem aty për të komentuar në një panel interesant, nën drejtimin e Ledion Liços që më bëri të shoh pjesën më të madhe të filmave më të mirë të kandiduar...”
Vejsiu qëndroi për tre vite në Top Channel deri në 2001-shin, kur producentja Vera Grabocka i besoi emisionin e parë bashkë, “Ëndrrat e një nate vere”. Që aty, mes tyre do të niste një bashkëpunim shumëvjeçar që vijon ende sot, me programe si “Dance With Me” apo “Your Face Sounds Familiar”.
