Ndërkohë që shumë vajza e ndjekin muajin e modës për të parë tendencat e fundit të veshjeve, unë, si gjithmonë, e kam mendjen te make up-i. Ju nuk e imagjinoni dot sa e lumtur isha kur pashë që trendi i 2017-ës për grimin ishin sytë e lyer me ngjyra të forta në mënyrë grafike, dhe lëkura e lyer shumë lehtë. Mendova se më në fund erdhi dita që do të shoh vajzat të eksperimentojnë me pamjen e tyre dhe do të dalin nga korniza e make up-it "Kardashian" (jo se ka ndonjë gjë të keqe me këtë të fundit). Por, sapo ju tregoja vajzave për këtë trend, më thoshin: "Shumë bukur, por mua nuk më shkojnë ngjyrat."
Në mendjen time, s’e kuptoja çfarë donin të thoshin. Për mendimin tim, mjafton të dish disa hile dhe çdo gjë të shkon! Për ta vërtetuar këtë, "rrëmbeva" vajzat e stafit për t'i lyer me ngjyrat e ndezura, për t'ju treguar atyre dhe juve si mund të dukeni bukur edhe me këtë trend të pazakontë.
Paleta që zgjodha për këtë ishte nga GOSH Copenhagen, pasi ajo kishte të gjitha ngjyrat që më duheshin.
Fillojmë me fotografen tone Nurjonën, ose Nur Dritëshkroja, siç i pëlqen ta thërrasin, ose Nu flokëkuqja, siç i flas unë.
Nurjona ka flokët më të veçantë në zyrën tonë, edhe nuk m’u desh shumë kohë të zgjidhja ngjyrën e saj. Mendova ta lyej me të verdhë, që sytë të duken si petalet e një luledielli.
Në fytyrë përdora fondatinën Foundation drops, dhe për t' dhënë shkëlqim, përdora produktin Lumi Drops në mollëza. Ky produkt i dha lëkurës të Nurjonës një pamje më të shkëlqyeshme.
Për ta bërë të verdhën më të dukshme, i vendosa poshtë lapsin e bardhë Kohl nga Gosh, si një bazë. Gjithashtu, për t'i dhënë syrit pak formë, përdora lapsin e zi Ultimate dhe rimelin Lash Sculpting Fibre Mascara. Për vetullat përdora xhelin Brow Sculpting Fibre Gel , për t'i mbajtur në formë vetullat e saj të plota.
Nurjona vendos buzëkuq të errët dhe prandaj dhe për këtë pamje unë vendosa të përdor një vishnje shumë të errët. Buzëkuqi mat nr 17 nga Gosh Copenhagen.
Vazhdojmë me Kristin, editorja jonë e modës. Kristi është vajza më stylish e zyrës tonë.
Për të zgjodha ngjyrën pink të fortë, që i shkon jo vetëm me tiparet, por edhe me karakterin e saj, sa të fortë aq edhe femëror.
Kristi e ka lëkurën të yndyrshme, prandaj përdora pudrën matifikuese Prime n Set nga Gosh Copenhagen. E veçanta e kësaj pudre është se mund të përdoret edhe poshtë edhe sipër fondatinës, për ta mbajtur yndyrën nën kontroll. Në buzët e saj përdora Lip Oil, pasi doja që gjithë vëmendja të ishte te sytë. Kam rënë në dashuri me Lip Oil, pasi është një produkt vajor që i hidraton dhe i shëron buzët e thata, dhe ka shkëlqim të fortë.
Në fund erdhi rradha e Gentës, më e ëmbla prej gazetareve tona.
Genta më kujton vajzat e viteve ‘60 dhe shpirti i saj kreativ më bëri ta imagjinoj me ngjyrën blu të thellë të detit.
Për ta bërë më të thellë ngjyrën, para aplikimit, e laga furçën me ujë, pastaj e mbusha me hijen e syve dhe e aplikova në sy.
Për t’i konturuar fytyrën, përdora paletën më të re nga Gosh, e cila i përmbledh në një të gjitha produktet që ju duhen. Shikoni sa bukur shkëlqen highlight-i në faqet e saj!
