1.Triumfi i të zezës
Padyshim që e zeza ishte ngjyra e preferuar e artisteve pjesëmarrëse në këtë edicion të spektaklit “Kënga Magjike”. Qoftë thjesht për t’u dukur elegante, për t’u përshtatur me këngën, apo edhe për të fshehur tek-tuk ndonjë defekt, e zeza dominoi në skenë. Aq shumë ishin të ngjashme një pjesë e madhe e siluetave të tyre, saqë edhe sikur Rozana Radi, Anxhela Peristeri dhe Rosela Gjylbegu të ndërronin veshjet, askush nuk do ta kuptonte ndryshimin.
2. Ky ishte viti i veshjeve teatrale
Artistët kanë filluar gjithnjë e më shumë të bëjnë zgjedhje të detajuara përsa i përket veshjeve, duke mos zgjedhur më thjesht diçka që i bën të duken bukur, por edhe për t'i përshtatur sa më shumë me fabulën e këngës dhe atmosferën që ajo krijon. E tillë ishte veshja në stil kimono e Flaka Krelanit, e punuar nga stilistja Dona Matoshi, veshja e zezë dhe kapelja me rrjetë e Tunës, e realizuar nga Joni Peçi, veshja ‘alla Chanel’ e Mariza Ikonomit, kostumet e djemve të Alar Band-it që kombinoheshin me ngjyrat e ndriçimit, ‘xhungla urbane” e Xhejsarës etj.
3.Deja vu-ja e Arilena Arës
Me kostumin elegant të bardhë dhe me flokët e gjatë të drejtë, Arilena Ara evokoi imazhin e Elvana Gjatës në performancën e saj në spektaklin “100 vjet muzikë” disa vite më parë.
4.U zbulua trëndafili më i madh në Shqipëri
Trëndafili në fustanin e Juliana Pashës me siguri ishte më i madhi që publikut shqiptar i kishte zënë syri ndonjëherë në një spektakël televiziv. Aq sa, dikush pyeti se sa e kishte ujitur Juliana trëndafilin që ishte bërë aq.
5.Versace si krenari kombëtare!
Në një debat me anëtarin e jurisë Olti Curri, reperi Hit Man pohoi me krenari se ai vishej “me Versace dhe jo me Joni Peçi”. Një goxha deklaratë për vitin 2016, kur kokat e luanëve kanë filluar të na duken si doreza dyersh.
6.Harrojini papionët e Ledionit! Papioni i Olti Currit mori famë ndërkombëtare
Filloi me debatin me një grup që u eleminua, dhe që e krahasoi papionin e anëtarit të jurisë Olti Curri me atë të një kamarieri; dhe përfundoi me memet në rrjetet sociale që e krahasonin me një arush të madh dhuratë. Papionët e Edi Ramës dhe të Ledion Liços të mbajnë radhën!
7.Kadifja
Ashtu si në të gjithë botën, edhe në Shqipëri, vijojnë ethet e kadifes, materiali më trend i 2016-ës.
Copyright Anabel.al / Ndalohet ribotimi pa lejen e redaksisë.
