Eno Birko ishte një prej emrave më në zë të baletit shqiptar në vitet ’90-2000. Prej kohësh, emri i tij nuk përmendej më askund. Balerini u shfaq për herë të parë pas shumë vitesh në një ekran dhe rrëfeu se për një kohë të gjatë ka luftuar varësinë ndaj alkoolit.
“Kjo nuk ishte një fazë e vështirë vetëm për mua, pasi unë nuk isha në gjendje as të mendoja, por ishte shumë e vështirë për familjen time, mamin dhe motrat e mia, që kanë derdhur shumë lot”, tha ai në "Pasdite në Top Channel".
Tani është në gjendje të mirë fizike e megjithatë, e kujton si një periudhë të errët, pasi kishte rënë në një rreth vicioz që i ndryshoi gjithçka, që nga pesha, deri tek mënyra e jetesës. Ai e përshkruan si “ëndrrën më të keqe të jetës”.
E gjitha nisi pas një ndërhyrjeje kirurgjikale në hernien diskale, pas së cilës nuk mund të kthehej në rolet si solist në Teatrin e Operas dhe Baletit. Nuk lëvizte më, konsumonte shumë alkool, përherë në gjendje ankthi; pesha e tij ndryshoi drastikisht, në 120 kilogramë.
Por roli i ri në shfaqjen “La Sylphide” në TOB e sjell atë fitimtar pas periudhës së errët, të cilën, siç pohon, e kaloi me mbështetjen e madhe të nënës dhe motrave.
Burimi: Top Channel
