Boris Bork kishte gjithçka. Miliarderi rus ngiste makinave luksoze, hante ushqime të shtrenjta dhe shihej shpesh në shoqërinë e vajzave të bukura. Fotot e tij në Instagram ishin provë e jetës së tij të luksit dhe pasurisë marramendëse. I kishin siguruar Boris-it jo pak, por plot 17.000 ndjekës, si dhe një rol në videoklipin e një bande të njohur muzikore në Moskë.
Por jo gjithçka është ashtu siç duket në rrjete sociale. Pikërisht kjo u vërtetua nga dy djem, të cilët e krijuan një personazh si Boris nga imagjinata e tyre, për të provuar që nuk duhen shumë para për të krijuar një sensacion në internet. Konsulenti i marketingut, Roman Zaripov, 23-vjeç, tregoi se kjo ide i kishte lindur bashkë me mikun e tij bloger, pasi lexuan një artikull ku thuhej që për të qenë një yll në mediat sociale, duhet të shpenzoje shifra me ‘gjashtë ose shtatë zero’.
Të bindur se mund ta realizonin diçka të tillë për shumë më pak para, dy shokët kërkuan në VKontakte, (llogari Facebook-u që përdoret mes shtetasve rusë), për një ‘gjysh’ që dukej si milioner. Aty gjetën Boris Kudryashov, një pensionist i gatshëm të ndiqte lojën e tyre. Ata shpenzuan javë të tëra duke shkrepur fotografi, ku z. Kudryashov, që jeton me qera në një shtëpi modeste për 195 dollarë në muaj, do të kthehej në ‘miliarderin Boris Bork’.
Zaripov pohoi i shtangur: ‘sa e lehtë është të mashtrosh njerëzit dhe askush nuk përpiqet t'i konfirmojë informacionet’. Kur fama e Boris nisi të rritet, po ashtu numri i ndjekësve, nisën të vërshojnë edhe ofertat e punës. “Jam ende i shokuar se si me vetëm 800 dollarë për dy muaj, mund të bësh dhjetëra mijëra të rritur të besojnë tek një njeri që nuk ekziston,” u shpreh njëri nga djemtë që ndërmori këtë iniciativë.
