Erjon Selimaj, djali i cili po tenton të vrasë veten duke u hedhur nga vinçi në stadiumin “Qemal Stafa”, ka treguar më herët në televizion jetën e tij të vështirë. Ai ka qenë pjesë e emisionit “Njerëz në Fokus” ku ka rrëfyer sesi është rritur pa prindër dhe me çfarë i është dashur të përballet.
Pas përfundimit së gjimnazit, 25-vjeçari është arrestuar tre herë dhe ka kryer disa muaj burg.
“Prindërit e mi s’janë kujtuar asnjëherë për mua. Para dy viteve, kam shkuar për ta takuar babanë. E pashë në çfarë gjendje ishte. U mundova ta ndihmoj, t’i rregulloja shtëpinë dhe t’i lidhja pensionin. Por, pas kësaj, shkova sërish në burg. Në këto momente ai është duke vdekur. Kam folur me mamanë, por nuk interesohet për mua. Ajo jeton në Itali dhe ka krijuar një familje tjetër. Kam kërkuar ndihmë tek prefektja, shërbimi social dhe në Bashki.”-ka treguar në një intervistë për "News 24" në prill të vitit 2016.
Ndërkohë gazetarja Ola Brukaj tregoi në lidhje direkte ditën e sotme se Erjoni i kishte shprehur më parë se do tentonte të vriste veten.
Nga kontaktet e herëpashershme me të, kam kuptuar që Erjoni si një rast problematik nuk i ka pranuar zgjidhjet që i janë dhënë pas paraqitjes në emisionin ‘Njerëz në Fokus’. Ai gjithashtu pati një debat me kryetarin e Bashkisë së Vlorës. Sipas këtij të fundit, Erjoni duhej të vlerësohej nga një komision multidisiplinar”, tha ajo.
Në një tjetër lidhje direkte për “News 24”, aktivisti Klodi shprehur se në të vërtetë Erjoni nuk është ndihmuar. Ai është nxjerrë me dhunë nga konvikti i Vlorës dhe nuk i është ofruar asnjë ndihmë konkrete për ta nxjerrë nga gjendja e tij.
