E patë videoklipin e ri të Beyonce-s? Ndoshta më kot pyesim, me siguri e keni parë. Përpos skenave fantastike, ku Beyonce midis të qënit 'xheloze' dhe 'e çmendur', vendos të jetë 'e çmendur' dhe të shkatërrojë të gjithë qytetin, ai që bie në sy është padyshim fustani i saj ngjyrë mustarde. Në fakt ai është bërë simboli i të gjithë albumit “Lemonade”, njëkohësisht marka e tij. Prandaj dhe përzgjedhja e tij nuk mund të ishte e rastësishme. Stilistja B. Akerlund, njëherësh autorja që ka veshur të gjithë personazhet në videon “Hold Up”, tregon në një intervistë për “Hollywood Reporter” për eksperiencën në realizimin e klipit.
Çfarë ju frymëzoi për realizimin e veshjes?
Ishte bashkëshorti im (regjisori i videos) që insistoi për një fustan të verdhë. E kishte këtë ide që në fillimet e xhirimeve. Më thoshte gjithë kohën: “Fustan të verdhë, fustan të verdhë, fustan të verdhë!”. Kështu që unë u detyrova të merrja në konsideratë çdo fustan të mundshëm të verdhë që ekziston!
Sa kohë u desh deri në realizimin e klipit?
Për projektin më dhanë më pak se një javë. Kisha dy mundësi: fustanin e verdhë dhe një palë rrobabanjo. Duke qenë se duhej të vishja dhe të tjerët që ishin të pranishëm në video, le të themi që m’u desh të merrja me vete një kamion. Megjithatë, kur ke dy veshje të preferuara, të tjerat duken shumë të lehta.
Si e vendosët pikërisht fustanin e verdhë?
Në fakt, kishim në plan të përdornim një tjetër fustan, por kur pamë fustanin Cavalli që vinte direkt nga pasarela, nuk patëm asnjë dyshim! Aty m’u krijua para syve i gjithë vizioni i videoklipit.
Çfarë e bën këtë fustan kaq të pëlqyeshëm?
Gjithçka: është i derdhur, transparent dhe duket sexy. Mendoj se fustani është ai e bën videon të paharrueshme dhe ikonë. E verdha është një ngjyrë që flet, tregon siguri dhe vendosmëri.
Ju përmendët më parë që kërkuat çdo fustan të verdhë që ekzistonte. Ishin ata të së njëjtës nuancë apo ndryshonin?
Provuam nuanca të ndryshme, por kur tenton drejt asaj “limon”, ndodh që mund të gabosh. Prandaj vendosëm për “mustardën”, ngjyrën perfekte që nxirrte në pah pigmentin e saj të lëkurës, por në të njëjtën kohë, dukej edhe në modë.
Si do ta përshkruanit karakterin e personazhit të krijuar në videon “Hold Up”- sepse ashtu siç të gjithë e kemi parë, ajo ka veshur një fustan femëror ndërkohë që shkatërron gjithë qytetin me një shkop bejzbolli në dorë?
Meqë vetë videoja është e dhunshme, po kërkonim një pamje flirtuese, pozitive dhe sexy për të zbutur forcën e saj si grua. Doja të tregoja që mund të dukesh emotive dhe në të njëjtën kohë seksi dhe e fortë!
