Yusra Mardini, 18 vjeç, notarja siriane e Ekipit të Refugjatëve, nuk është një emër i panjohur për mediat. Në mars, historia e saj sesi shpëtoi nga mbytja në sajë të talentit në not, mori shumë vëmendje publike, dhe i solli një ftesë të menjëhershme nga Komiteti Ndërkombëtar Olimpik për të qenë pjesë e ekipit zyrtar të refugjatëve në Rio 2016, për disiplinën e notit.
Asgjë e rrugëtimit të saj nga Siria në Lojërat Olimpike nuk ka qenë e zakontë. Një vit më parë, ajo dhe motra e saj lanë Sirinë duke nisur një udhëtim të gjatë përmes Libanit, Turqisë, Greqisë, Ballkanit dhe Evropës Qendrore për në Gjermani, duke i shpëtuar vdekjes për një fije peri. Varka e tyre e vogël u prish teksa lundronin nga Turqia për në Greqi. Por të dyja motrat të dyja notare, u zhytën duke e shtyrë varkën derisa mbërritën në tokë.
Kur kjo histori u mësua nga mediat, Yusra u kthye në një simbol të ngritjes shpirtërore në një kohë krize të thellë për refugjatët që humbnin jetën për të shkuar në azilet në Gjermani. Në qershor, ajo u shpall zyrtarisht pjesë e Ekipit të Refugjatëve për Lojërat Olimpike Rio 2016, bashkë me nëntë atletë të tjerë nga Siria, Sudani i Jugut, Republika Demokratike e Kongos dhe Etiopia.
Tashmë, ajo konkurron në Lojërat Olimpike në disiplinën e notit në stil të lirë 100 metra dhe not flutur 100 metra. Ajo parakaloi me ekipin e refugjatëve në ceremoninë e çeljes së Rio 2016 me një buzëqeshje rrëzëllitëse, teksa ngrinte lart flamurin e ekipit të njërëzve që ashtu si ajo, kanë fituar garat më të vështira të jetës.
Burimi: New York Times
