Janë të dy personazhe shumë të njohur për shqiptarët dhe sigurisht që martesa dhe më pas divorci i tyre bëri shumë bujë. Behgjet Pacolli është shqiptari më i pasur në botë, ndërsa Anna Oxa është njëra nga shqiptaret që ka arritur të jetë e suksesshme jashtë kufijve të vendit tonë. Dhe këta të dy bashkë nuk mund të kishin asgjë më pak se një histori të denjë për filma.
Në një intervistë të dhënë së fundmi për “Elite Zone” Pacolli ka sjellë dhe njëherë në vëmëndje historinë që nisi në vitin 1999 dhe mbaroi në vitin 2002, një histori e vërtetë dashurie. Rrëfimi i tij në fakt fillon më parë, në librin biografik “Nga sfida në sfidë” që Pacolli botoi në vitin 2010.
“Me Anën jam njohur prej shëndetit të saj. Ajo vuante nga boshti i kurrizit, nga një shkarje unazash. Menaxheri i saj e dinte që unë udhëtoja shpesh për në Rusi, kështu që më kontaktuan për të sjellë një mjek të mirë nga Rusia. S’e kisha takuar asnjëherë më parë, por sigurisht që kisha dëgjuar. Me të sjellë nga Rusia mjekun që i duhej, ajo tani vinte në shtëpinë time dhe i bënte aty masazhet dhe terapitë fizike. Më pas, i solla në Lugano edhe një mjeke-natyraliste nga Tivari i Malit të Zi, e cila ishte bërë e njohur për rezultatet e mira që kishte arritur në mënjanimin e këtyre problemeve shëndetësore. Me trajtimin që i bënë këta dy mjekë, Ana e hoqi brengën se mund të kishte ndonjë defekt të lindur. Dhe, kështu filloi lidhja jonë, gati si papandehur, pa sforcime e teprime” shkruan Behgjeti.
Më tej, ai vijon duke treguar arsyen e ndarjes së tyre dhe duke ja hedhur fajin motrës së madhe të Anës, e cila sipas tij ishte xheloze. Ishte një incident me këtë të fundit, ku kjo e akuzonte se e kishte rrahur, ai që e detyroi Anën të kërkonte divorcin. Dhe sot për "Elite Zone" ai përshkruan për herë të parë pas 17 viteve, ndjesitë e tij për Annën: “Kur arrij në shtëpi dhe shikoj që Anna kishte marrë vetëm gjërat personale me vete, mbeta pa fjalë! Më dërgoi çelësat e makinës dhe çdo gjë që i kisha blerë unë. Nuk mbajti as kartat e kreditit dhe asnjë dhuratë nga ato që i kisha bërë. Ishte treguar shumë e kujdesshme dhe fisnike. Ajo edhe sot jeton shumë thjeshtë, ajo e shikon jetën ndryshe. Anna nuk është grua që e kalon mbrëmjen nëpër darka gala apo harxhon shumë. Anna është e lumtur me një makinë të vogël, aspak luksoze. Kur jetonim bashkë, ajo pastronte dhe gatuante vetë”
“Mund të them lirisht se ka qenë një zonjë në kuptimin e plotë të fjalës. Edhe në momentin e fundit. Gjithmonë dëshiroj të dëgjoj mirë për të. Ditën e gjyqit, u përshëndetëm si miq dhe secili shkoi në rrugën e vet” e përshkruan Behxheti ish-bashkëshorten e tij duke na lënë të kuptojmë që edhe pas kaq shumë kohësh, ashtu si vetë Behgjeti pranon, ai akoma ka një ndjenjë të veçantë për Annën.
Copyright Anabel.al / Ndalohet ribotimi pa lejen e redaksisë.
