Elton Ilirjani, drejtues i një kompanie të madhe punësimi në Shqipëri, ka deklaruar: ‘Unë jam gej’. Ai ka folur hapur për orientimin e tij seksual dhe vështirësitë për t’u pranuar nga familja, njerëzit e mbi të gjitha nga vetja, në një event në ditën e ndërgjegjësimit ndaj homofobisë. Por tani, Ilirjani thotë se nuk i vjen aspak keq ta pranojë publikisht:
‘Unë do ta thosha hapur dhe shumë troç.’ është shprehur ai,’ Unë nuk jam vetëm themeluesi i kompanisë, por jam gay dhe jam gay krenar qe jetoj në Tiranë.’
Ai ka treguar edhe momentin kur i është dashur t'i tregojë babait të tij, në fillimvitet '90 kur ata jetonin në Tepelenë. Ilirjani është shprehur se ka qenë një kohë kur ishte e vështirë të dilje hapur për orientimin seksual por megjithatë, ka qenë me fat:
'Në vitin 1991 unë i them babait në një bisedë shumë personale që jam gay, dhe të them të drejtën mund të kem qenë i llastuar sepse nuk u përballa me largimin, por u përballa me realitetin duke mu thënë që është rruga më e vështirë, ndoshta jo rruga e keqe. Dhe që këtu fillon sfida. Imagjinoni të jetosh në Tepelenë në vitin 1991, dhe unë që tundesha pak, isha pak feminin, ku më zinin me gurë, më shanin me ofendonin.'
Në këtë event ishin mbledhur përfaqësues të 5 bizneseve, me qëllim për të ndërgjegjësuar kundër diskriminimit të gejve në ambjentet e punës. Ishte e pranishme edhe Romana Vlahutin, ambasadore e Bashkimit Evropian, si edhe shumë personalitete të biznesit, por edhe ekranit.
