Papa Françesku ka pranuar një mrekulli të dytë mjekësore që i atribuohet Nënë Terezës së ndjerë, duke hapur kështu rrugën e shenjtërimit për murgeshën e dashur në vitin e ardhshëm, shkruan gazeta katolike "Avvenire".
Nënë Tereza, e njohur për punën e saj me të varfërit në qytetin indian të Kalkutës, pritet të kanonizohet zyrtarisht në Romë më 4 shtator, sipas ekspertes së gazetës së Vatikanit, Stefania Falasca.
Ky veprim vjen pasi një panel i ekspertëve, i thirrur tri ditë më parë nga "Congregation for the Causes of the Saints", i atribuon Nënë Terezës një shërim të mrekullueshme të një personi në Brazil me tumore të shumta në tru, raporton "Avvenire".
Nënë Tereza, e cili ka lindur nga prindër shqiptarë- në atë që tani quhet Shkupi në Maqedoni- ishte e njohur në të gjithë botën për punën e saj bamirëse. Ajo vdiq në vitin 1997 në moshën 87.
E njohur ndryshe edhe si "shenjtorja e të varfërve", Nënë Tereza ia kushtoi jetën të varfërve e të sëmurëve në lagjet e varfëra të Kolkata-s, një nga qytetet më të mëdha të Indisë. Ajo fitoi Çmimin Nobel për Paqen në vitin 1979.
Ajo u lumturua atëherë nga Papa Gjon Pali II në një proces të përshpejtuar në 2003-shin, në një ceremoni të ndjekur nga rreth 300,000 pelegrinë. Lumturimi është hapi i parë drejt shenjtërimit.
Në vitin 2002, Vatikani njohu zyrtarisht një mrekulli që u tha se ajo ka kryer pas vdekjes së saj, përkatësisht shërimin në 1998-ën të një gruaje në Bengali, Monika Besra, e cili vuante nga një tumor në bark.
Procedura tradicionale e kanonizimit kërkon të paktën dy mrekulli.
Kanonizimi i saj pritet sërish të tërheqë turma të mëdha në Romë në atë që ka të ngjarë të jetë një nga pikat kulminante të vitit të veçantë Jubile.
Burimi: The Guardian; Përshtati; Jolinda Levonja
