Të gjitha ne marrim bluza me kapuç ose rroba të ndryshme nga dollapi i të dashurit, por për rastin e Riri-t dhe A$AP Rocky-t ndodh e kundërta. Është reperi ai që vjedh rroba nga dollapi i partneres së tij.
Në episodin e podkastit “The Run-Through” me Vogue, reperi dhe bashkëprezantuesi i Met Gala 2025 pranoi se i ka “vjedhur” ca rroba nga garderoba e Rihanna-s — disa prej të cilave, sipas tij, e dashura ndoshta as nuk e di që ia ka marrë.
Kur u pyet për stilin e tij të të veshurit, ai u shpreh: “
Bëj çfarë të dua… Dua të përfaqësoj, dua të jem katalizator për burrat guximtarë.”
Artisti i “Fashion Killa” vijoi: “Nuk e di kush e ka vënë vijën ndarëse mes feminitetit — apo thjesht të qenit femëror — dhe maskilitetit. Nuk e di kush e ka bërë këtë ndarje, por për mua nuk ka barriera.”
A$AP Rocky gjithashtu nuk mendon se është “e drejtë” që e dashura e tij mund të marrë ç’të dojë nga garderoba e tij për të kompletuar një veshje. “Kjo gjë funksionon në të dy drejtimet,” tha ai. Sipas Rocky-t, edhe Rih është po aq “fajtore”. “Ndonjëherë e shikoj në ndonjë intervistë ose në ndonjë foto nga paparacët dhe them: “Prit pak! A nuk është ajo xhaketi ime nga Miu Miu?! Çfarë dreqin? E kam kërkuar që nga viti 2021.’”
Këngëtarja e “Diamonds” ka thënë se edhe ajo e admiron stilin e partnerit të saj, duke shtuar më parë se ndonjëherë ndihet “sikur nuk duket” kur është me të. Riri ka theksuar se për shembull kur janë në aeroport, për të bërë një fluturim dhe të gjithë vishen me tuta, A$AP shfaqet me një kostum Bottega.
Nga ana tjetër, A$AP ritheksoi se veshjet janë thjesht rroba dhe nuk e përcaktojnë gjininë.
“Për mua, fustanet e burrave, perlat etj— këto janë gjëra që dikur janë perceptuar si zhburrëruese dhe femërore. Dhe në fakt, të gjitha kanë nisur nga burrat afrikanë që i kanë veshur”, referuar fustaneve dhe perlave.
Artikuj të sugjeruar:
