Ndahet nga jeta gazetari i shquar Fatos Baxhaku. Publicisti i njohur, ka ndërruar jetë në moshën 55-vjeçare si pasojë e një sumundjeje të rëndë nga e cila vuante prej disa kohësh. Baxhaku, lindi në Tiranë më 9 janar të 1964-ës dhe u diplomua për Histori në Universitetin e Tiranës. Dokumentarët, reportazhet dhe shumë shkrime të tij u mbajtën mend gjatë si kritika të forta gjatë tranzicionit shqiptar.

Që nga 1986-ta e deri në 1992-in punoi në Institutin e Historisë së Akademisë së Shkencave, për të vijuar më tej si bashkëthemelues, kryeredaktor dhe gazetar në “Gazetën Shqiptare”.

Gjatë viteve ’98-’99 punoi si kryeredaktor i parë i lajmeve në Klan dhe nga 1999-2000 ishte kryeredaktor i revistës së përjavshme të asaj kohe “XXL”.

Për 4 vite me radhë, Fatos Baxhaku ishte gazetar dhe kryeredaktor në televizionin “Vizion Plus”. Nga 2006-2015 ishte kryeredaktor dhe gazetar tek “Shqip”.

Ai gjithashtu ka qenë autor dhe bashkëautor i disa serialeve si “Tunel” (Vizion Plus), “Rrugëtim” (Top Channel), “Shtëpia e Vjetër” (Digitalb) dhe i shumë dokumentarëve televizivë.

Ndarja  e tij në mënyrë të parakoshme është një humbje e madhe për botën e medias së shkruar shqiptare.

Burimi: Top Channel