Marrëdhëniet midis dukës dhe dukeshës së Sussex-it dhe princit William dhe Kate Middleton u përkeqësuan aq shumë sa që deri në mars të dy çiftet mezi po flisnin, pretendon një libër mbi Harry-n dhe Meghan Markle.

“Finding Freedom”, një libër nga reporterët Omid Scobie dhe Carolyn Durand, pretendon se çiftet mezi folën në kishën Westminster Abbey në mars, ndonëse nuk e kishin parë njëri-tjetrin që prej janarit dhe sipas tyre, ftohja e marrëdhënies ishte rezultat i vendimit të Harry-t dhe Meghan-it për t’u larguar nga familja mbretërore.

Libri do të botohet në gusht, ndërkohë që princ Harry dhe bashkëshortja e tij kanë thënë nuk janë intervistuar dhe nuk kanë dhënë asnjë kontribut për realizimin e tij.

Autorët përshkruajnë në libër një kulturë pakënaqësie gjithnjë e në rritje midis çiftit të Sussex-it dhe anëtarëve të tjerë të familjes. Në disa fragmente të librit, thuhet se ata mendonin se ankesat e tyre nuk merreshin seriozisht dhe besonin se njerëz të afërt në mbretëri po nxirrnin historitë për mediat. “Kishte vetëm një grup të vogël njerëzish brenda Pallatit, të cilëve u besonin me të vërtetë,” pretendojnë autorët.

Libri gjithashtu pretendon se Harry u ndje i “pambrojtur” nga familja dhe u zhvlerësua brenda mureve të mbretërisë për shkak se ishte “tepër i ndjeshëm dhe i hapur”. Omid Scobie tha se ishte e vështirë për Meghan, si një amerikane me racë të përzier, të bashkohej me familjen mbretërore.

Pas botimit të disa fragmenteve të librit, një deklaratë në emër të Harry dhe Meghan tha:

"Duka dhe Dukesha e Sussex-it nuk u intervistuan dhe nuk kontribuan. Ky libër është i bazuar në përvojat e autorëve si anëtarë të korpusit të shtypit mbretëror dhe raportimit të tyre të pavarur.”

Burimet: The Guardian, Reuters